Nga Mensur Krasniqi
Duhet të na ngushëllojë fakti që nuk jemi të vetmit që e katandisën kopshtin e vetëm zoologjik, atë të Tiranës, në një “kamp përqëndrimi” për gjënë e gjallë të atyshme. Ngjashëm me modelin kafshëror të trajtimit të kafshëve, shfaqet dhe fqinji ynë, Maqedonia, ku kopshti zoologjik i Shkupit ofron pamje përvuajtëse të qënieve të atyshme të mbyllura pas hekurave, jo aq të këndshme për t’i parë.
Në uri dhe papastërti – kjo gjendja e tyre, ku dhe në sy u lexohet halli që i ka zënë nga trajtimi… “kafshëror” i sunduesve të tyre dykëmbësh.
Vizitorët që shkojnë aty u dhimbsen ato të gjora krijesa, ndaj dhe u lëshojnë ndonjë gjësend për të ngrënë, ndonëse kjo nuk është e lejuar.
Portali tesheshi.com, duke qenë dëshmitar i këtyre pamjeve brengosëse, arriti të kontaktojë me njërën nga gratë përgjegjëse për përkujdesin e kafshëve, duke u informuar në mënyrë jozyrtare prej saj për situatën e tyre brenda kopshtit. Sipas saj, stina e dimrit është e kobshme për kafshët, meqë jo çdonjërës mund t’i sigurohen kushtet e përshtatshme për jetesë.
“Ka nga kafshët të cilat, si përshembull disa nga llojet e tigrave, që nuk munden dot pa gjelbërim, ndërsa ambienti ku është rrethuar për momentin më shumë ka baltë se sa bar. Kjo ndikon shumë në aspektin psiqik të depresionit dhe vuajtjeve, andaj nuk dalin shpesh jashtë strehimores, ku si pasojë edhe vizitorët humbin arsyet që gjatë stinës së dimrit t’na vizitojnë aq shumë”, sqaron gruaja në konfidencë.
Ndërsa e pyetur për mbishkrimet e shpeshta tek ato ku thuhet : “Mos i jepni ushqim kafshëve”, dedikuar kjo për vizitorët, dhe pse e njëjta lejohet nga ta në praktikë, ajo me gjysme goje thotë: “Ndonjëherë më mirë pak se hiç”.
Dëshmia më e mirë për urinë e kafshëve janë edhe fotografitë të cilët i ka shkrepur aparati i tesheshi.com në të cilat shihen dy arusha si e copëtojnë dhe e hanë gomën e madhe.
Ndërsa mbi papastërtinë e disa kafshëve, nuk mund të flasin aq shumë pamjet fotografike sa era e keqe që nuhasin vizitorët e këtij kopshti zoologjik.
Ky kopsht në Shkup daton që nga viti 1926, ku nuk ka pasur më shumë se 4 hektarë tokë, dhe kryesisht gjitha kafshët ishin si dhuratë nga shtetet tjera.
Ndërsa sot, i njëjti është i gjërë 12 hektarë dhe disponon 503 lloje kafshësh, përfshirë këtu, nga shpendë më të buta deri në kafshët më të egra.
Por gjendja e tyre është si mos më keq. Kur sheh qendrën e Shkupit me statujat gjigande e pompoze, e më pas këtë kopsht zoologjik me krijesa të cfilitura, e kupton më së miri se si shkojnë punët e këtij vendi. /tesheshi.com/
