Një grup arkeologësh peruan zbuluan një mumje mashkullore të ruajtur mirë më shumë se 3000 vjeçare gjatë gërmimeve në një vend antik.
Ky zbulim është pjesë e programit të rimëkëmbjes dhe valorizimit “Huaca La Florida”, i udhëhequr nga komuna peruane e Rimac me mbështetjen e Universitetit Kombëtar të San Marcos.
Mumja u gjet në gjendje të shkëlqyer brenda një varri guri, i mbështjellë në një pako varrimi prej pambuku amtar. Pranë mumjes u zbuluan disa objekte, duke përfshirë gjerdan, misër dhe fara.
Ministria e Kulturës u ka dhënë leje arkeologëve që të vazhdojnë gërmimet, duke mundësuar një kuptim më të thellë të historisë së këtij lokaliteti arkeologjik, i cili njihet si trashëgimi kulturore botërore.
“Huaca La Florida” është një tempull parahispanik në formën e shkronjës “U” që daton rreth 4000 vjet më parë, gjë që e bën atë një nga monumentet më të vjetër në zonën metropolitane të Lima-s dhe më të vjetrin në Lugina e Rimac-ut.
Mumja e zbuluar lidhet me fazën e fundit të ndërtimit të tempullit dhe vlerësohet të jetë midis 3000 dhe 3500 vjet.
Gjendja e ruajtur mirë e mumjes, duke përfshirë flokët, indet dhe tekstilet, ofron një pasqyrë të vlefshme për jetën dhe vdekjen e banorëve të lashtë.
Kryebashkiaku Nestor De la Rosa tha se zbulimi i rëndësishëm i mumjes në “Huaca La Florida” kontribuon në vlerën kulturore të Rimac-ut dhe do t’i prezantohet botës.
Përveç kësaj, po zhvillohen plane për të ndërtuar Muzeun “Huaca La Florida” në atë vend, shtoi kryebashkiaku, duke theksuar më tej rëndësinë historike të rajonit.
“Ky zbulim është i një rëndësie të madhe për të kuptuar jetën dhe vdekjen e banorëve të lashtë”, tha Miguel Aguilar Diaz, menaxher i Qendrës për Histori dhe Kulturë të Rimac, e cila është përgjegjëse për gërmimet arkeologjike në “Huaca La Florida”. /tesheshi.com/
