Një grup të rinjsh protestues në Bagdad kanë nisur të pikturojnë muret e një tuneli në afërsi të qendrës së kryeqytetit, si një formë e reagimit të tyre, por artistikisht, ndaj qeverisë kundër së cilës janë ngritur.
Një prej tyre, Lina Musa këshillon që ata të vazhdojnë me demonstrime paqësore.
“Fotografitë dhe karikaturat janë pjesë e tyre. Ne duam t’i tregojmë botës se ne jemi një popull që jeton me art dhe që e do artin”, shtoi Musa.
Përveç tunelit, edhe në muret e ndërtesave rreth Sheshit Tahrir ka piktura dhe karikatura që simbolizojnë protestat e tetorit dhe kritikojnë qeverinë.
Dhjetëra mijëra protestues kanë mbajtur protesta masive antiqeveritare në Bagdad dhe qytete të tjera të Irakut që nga fillimi i muajit të kaluar. Ata janë të pakënaqur me shkallën e lartë të papunësisë, shërbimet e dobëta publike, si dhe korrupsionin e qeverisë aktuale.
Gjatë protestave, trazirat në rrugë janë shumë të zakonshme. Sipas Bankës Botërore, papunësia e të rinjve është rritur në 25 përqind në Irak, ndërkohë që vendi renditen ndër 12-të më të korruptuarit në botë.
Sipas Kombeve të Bashkuara, që nga 1 tetori, 229 njerëz janë vrarë në protesta dhe rreth 8,000 janë plagosur. /tesheshi.com/
