Njeriu i mbetur në hije nga protaginizimi i SPAK-ut, Prokurori i Përgjithshëm Olsian Çela, duke raportuar në Këshillin e Lartë të Prokurorisë, veçoi “etjen” e Shqipërisë për prokutorë, pra hetues, si një domosdoshmëri për ta në raport me çështjet.
“Në vitit 2023 numri faktik i prokurorëve në prokuroritë e juridiksionit të përgjithshëm ka qenë 198 (përfshirë dhe emërimet në korrik të 26 magjistratëve të rinj). Ky tregues evidenton strukturën faktike me 62 % të prokurorëve kundrejt numrit organik prej 321 prokurorësh dhe mungesën e 38 % të numrit të prokurorëve”, theksoi ai.
Në kuadër të këtij shqetësimi, ai tha se “viti 2023 ishte një vit sfidues për prokuroritë e juridiksionit të përgjithshëm për shkak të çështjeve administrative dhe procedurale që lidheshin me zbatimin e hartës së re gjyqësore dhe vijimit të uljes së numrit të prokurorëve si pasojë e pezullimit apo shkarkimit gjatë procesit të rivlerësimit kalimtar.” /tesheshi.com/
