Ndërsa të premten u fërshëllye, një ditë më pas kryeministri Edi Rama është përballur me të rinj që kërkonin largimin e tij. Kjo ka ndodhur në Shkodër, atje ku shefi i qeverisë ishte këtë fundjave për të prezantuar Planin e Turizmit në Alpe, ku përfshihet Shkodra, Malësia e Madhe dhe Tropoja.
Protesta ishte organizuar nga të rinjtë e Forumit Rinor Demokrat, por që sipas të cilëve aty kishte dhe të rinj socialistë
“Sot përballë kinemasë, nuk u grupuan vetëm demokratët, apo socialistët. Sot u grupuan të rinjtë dhe të rejat që janë mes dilemës a të ikin, a të qëndrojnë në këtë vend dhe sot morën vendimin që më mirë të largojmë Edi Ramën, sesa të largohemi ne”, deklaroi një prej krerëve të protestës.
Ndërsa pak më vonë, Rama do të kumtonte të ardhmen e Alpeve, aty ku sipas tij do jetë e ardhmja e turizmit.
“Ka nisur me rilindjen urbane, ku është ndërhyrë në disa pika në Shkodër. Është një program me ekspertizë vendase dhe të huaj, një platformë shumë e rëndësishme për investime në zonën Alpeve”, tha Kryeministri Rama. /tesheshi.com/
