Shumë shpesh harrohet faktori njerëzor kur flasim për krizën e refugjatëve. Kombet e Bashkuara thonë se ne jemi duke dëshmuar nivelet rekord të refugjatëve, pasi rreth tridhjetë njerëz çdo minutë dëbohen me forcë nga shtëpitë e tyre.
Ndërsa ne lexojmë komodë shkrimet për ta dhe kemi një vend të sigurt që e quajmë shtëpi, madhësia e problemit të refugjatëve është e vështirë për t’u kuptuar.
Në një botë ku mbi 68 milion njerëz kanë nevojë për ndihmën tonë, çfarë mund të bëjë një person?
Ka tash e shtatë vjet që lajmet janë përplot me imazhe të emigrantëve në Calais të Francë, duke kaluar nëpër autostrada të rrezikshme dhe hipur në kamionë në lëvizje. Policia po përpiqej të kontrollonte situatën, por kishte panik dhe kaos kudo. Në kampet e Calais, burra, gra dhe fëmijë ishin duke fjetur në çadra, nën ura ose në parqe. Kjo nuk po ndodhte thjesht në Calais – po ndodhte në Liban, Francë, Gjermani, Bosnjë, Kroaci, Turqi, Greqi, Libi dhe Bangladesh.
Shpesh kujtojmë se krejt çfarë i duhet një familjeje refugjatë është ushqimi, uji dhe streha mbi kokë. Por jemi gabim.
Për refugjatët në lëvizje, të kesh akses në telefonat mobil për të përdorur internetin dhe për të bërë thirrje është pothuajse aq thelbësore sa ushqimi dhe uji, shkruan Reuters.
Punëtori humanitar Isaac Kvamy tregon për Reuters se kur takoi migrantët në Evropë “shumë pak prej tyre thanë ‘kemi nevojë për ushqim apo ujë’. Ata pyesnin fjalë për fjalë: ‘A keni qasje në Wi-fi dhe ku mund t’i mbushim telefonat tanë?'”.
Fahimi, një refugjat nga Afganistani, duke pasur qasje në telefon i shpëtoi jetën vetes dhe katër djemve të tjerë, të cilët u bllokuan në bagazhin e një makine të drejtuar nga një kontrabandist.
Nuk është e vështirë të kuptosh pse ishte kaq e rëndësishme për ta komunikimi. Një telefon celular lejon që refugjatët të qëndrojnë në kontakt me të dashurit e tyre, të komunikojnë me agjencitë mbështetëse, të jenë të vetëdijshëm për situata të rrezikshme, të planifikojnë udhëtimin e tyre dhe të qëndrojnë të sigurt.
Izolimi, frika dhe gjendja e pafavorshme psikologjike përkeqësohet nga ndarja nga familja, miqtë dhe komuniteti.
Pa pasur mjete për të mbajtur kontakte me të afërmit që ende jetojnë në zonat e konfliktit, gjendja e tyre mund të keqësohet edhe më tej. /tesheshi.com/
