Partia Demokratike ka ndërruar në momentin e fundit emrin e Romeo Gurakuqit me atë të Edi Palokës, për postin e n/kryetarit të Kuvendit. Siç paralajmërohej dhe në një shkrim të tesheshi.com – http://localhost/tesheshi/parlamenti-ri-surpriza-e-seances-se-pare-anti-komunisi-romeo-gurakuqi-krah-ish-punistit-gramoz-ruci/ – profesori shkodran i historisë, ishte përzgjedhur për të qenë një mesazh i qartë politik në pozitën e njeriut në krah të Ruçit, si për të mikluar e mbajtur pranë, të gjith atë shtresë anti-komunistësh, jo pak të ftohur me PD-në, e që kjo parti po përpiqet t’i mbajë ende të lidhur pas saj duke iu vërsulur Ruçit në emër të anti-komunizmit, edhe pse e ka legalizuar me kohë atë si një emër normal në politikë.
Gurakuqi vërtet është një prurje fringo e re në PD, produkt çadre, ende pa përvojë në jetën parlamentare; por statura e tij prej një anti-komunisti me rrënjë e me degë, do e ndihte PD-në këto kohë të vështira për të, sidomos në rrafshin identitar e moral.
Vetë emërimi i Palokës si nr. 2 i parlamentit, është vijim i kësaj krize. Edhe pse ky post përkthehet ndryshe si “përcjellje me të mirë” e dikujt jashtë elitës partiake respektive – pra, që mund të shihet dhe si largimi i butë i Palokës – gjithsesi përbën një pozitë përfaqsuese për një parti; dhe Edi Paloka, edhe si kryetar i grupit parlamentar, siç ishte legjislaturën e kaluar, edhe tashmë si n/kryetar Kuvendi, nuk është një figurë dinjitare për t’i besuar pozita të tilla. I njohur në jetën parlamentare në vite dhe për kacafytje fizike, ku vecohet një rrahje me grushta me kolegun Arben Imami; për një fjalor aspak inteligjent dhe me terma rrugësh; për një formim nën mesatar në aspekte legjislative dhe pothuajse në asnjë fushë si kompetent, ai qëndron shumë më poshtë se pozita zyrtare karshi Gramoz Ruçit, i cili veç faktit të të paturit një cen politik nga e kaluara – ish-ministër i regjimit komunist – qëndron shumë lart si nga pikëpamja etike, si nga ajo e artikulimit politik, e si nga rrahja me vaj e uthull në çështje legjislative.
Edi Paloka n/kryetar Kuvendi, tipik një emër që reflekton krizën e thellë të një partie…/tesheshi.com/
