Nuk ka nevojë më që të ushqehet ndonjë konspiracion për Reformën në Drejtësi se kush qëndron pas saj, sipas paradigmës se “ku fshihet lepuri” i kësaj pune.
Soros e ka pranuar hapur se është financues i reformës së përfolur
Drejtori ekzekutiv i “Fondacionit Shoqëria e hapur për Shqipërinë”, Andi Dobrushi e legalizoi këtë fakt pa asnjë droje, madje duke i mveshur vetes dhe të qënit krenar për këtë gjë, jo si person por si fondacion.
“E gjej të udhës të sqaroj dy gjëra, duke pasur parasysh tymnajën e krijuar muajt e fundit lidhur me rolin e Fondacionit në Reformën në Drejtësi. Ka dokumente të mjaftueshme që dëshmojnë përfshirjen e Fondacionit dhe jemi shumë krenarë që kemi qenë të përfshirë. Është një reformë që mbështetet nga 96 për qind e shqiptarëve. Kemi mbështetur financiarisht, bashkë me ambasadën amerikane dhe projektin e delegacionit të Bashkimit Europian, të gjithë procesin. Kemi një marrëveshje me Parlamentin, që detajon mbështetjen që Fondacioni i jep procesit. Kemi pasur një ekspert, ish-gjyqtarin e Gjykatës së Strasburgut. Pjesa tjetër i jemi përgjigjur Komisionit të posaçëm të Reformës në Drejtësi”, tha më tej Dobrushi, gjatë një tryeze mbi pandëshkueshmërinë.
Ishin disa media pranë opozitës shqiptare ato që promovuan teorinë konspirative se pas Reformës në Drejtësi qëndronte Soros. Dhe kjo ndodhi fill pas miratimit të kësaj reforme në korrik të vitit të kaluar.
Paralel me këtë, për shkak të reformës goditjet kanë ndjekur dhe vetë ambasadorin Lu, duke e shkarkuar disa herë nga posti i kryediplomatit amerikan në Tiranë. /tesheshi.com/
