Presidenti i ri i Këshillit të Europës, Charles Michel, tha se ishte e nevojshme të ridizajnohet plotësisht e modernizohet, procesi i negociatave për anëtarësim dhe, siç u shpreh, “të shohim se si ne brenda BE duhet të reformohemi veçanërisht në lidhje me sistemin e vendimmarrjes”. Ky pohim i tij vjen pas një zhvillimi të pazakontë në Union, ku Tiranës e Shkupit, përkundër premtimeve, iu refuzua hapja e negociatave. Shkak për këtë u bë vetoja franceze, me tezën e njohur të Macronit se më parë duhej reformuar BE, para se të vijonte procesi i zgjerimit.
Michel, i cili do të kryesojë kryetarët e shteteve ose qeverive të BE-së, theksoi se “kjo është e rëndësishme sepse BE-ja, edhe me 27 anëtarët e saj të tanishëm, po përjeton një kohë të vështirë në vendimmarrje, ndërkohë që i duhet të marrë vendime të shpejta”.
Dhe, shpjegoi ai, për të parë kur dhe si mund të hapet dera për Union, duhet të “reformohet e modernizohet procesi i zgjerimit”.
Udhëheqësi i ri i BE-së i tha rrjetit televiziv France Info se kjo do të ishte detyra e tij në një situatë kur kishte mosmarrëveshje të gjerë midis shteteve anëtare të BE-së për zgjatjen dhe vonimin e vendimit për fillimin e bisedimeve të anëtarësimit me Maqedoninë Veriore dhe Shqipërinë.
Zyrtarët në Këshillin e Ministrave të BE kanë konfirmuar në të njëjtën kohë se ministrat e jashtëm duhet të diskutojnë përsëri për këtë çështje më 19 nëntor, në pritje që Franca në veçanti duhet të bëjë propozimet e saj mbi ndryshimet e thella të kërkuara në procesin e zgjerimit.
Franca, si dhe disa anëtarë të tjerë, mendojnë se parakushti për pranimin e një anëtari të ri është që së pari të fuqizohet vetë Unioni, institucionet e tij dhe mekanizmi i vendimmarrjes, në mënyrë që pastaj të konsiderohet kur dhe si të pranohet një vend në radhët e tij. /tesheshi.com/
