Kryeministri Rama është përpjekur të bëjë të qetin para asaj që pritet tashmë; pamundësisë që dhe kësaj here Shqipërisë t’i hapen negociatat me BE-në, gjithashtu duke patur dhe Maqedonia të njëjtin fat, e kjo për shkak të një “Jo”-je franceze, e cila lidhet me vizionin macronist për një reformë të thellë të BE-së para vijimit të procesit të zgjerimit.
“Në datën 19 dielli do të lindë përsëri dhe ne do të vazhdojmë përpjekjen. Ne nuk e bëjmë këtë për shtetet e BE, por për veten tonë. Herët apo vonë do të vijë në tryezë. Tani kanë hyrë në lojë të gjithë të mëdhenjtë. Kancelarja e udhëheq frontin e “Po”-së. Më mirë se kaq ne nuk mund të kishim në këtë moment. Të shohim si do të përfundojë në tryezën e Këshillit”, tha shefi i qeverisë shqiptare në një intervistë për A2 CNN.
Sipas tij, Tirana e Shkupi janë thjesht viktima të një zhvillimi të brendshëm në Union.
“Kjo situatë nuk ka lidhje me Shqipërinë apo me Maqedoninë e Veriut me atë që kemi bërë apo çfarë nuk kemi bërë, por ka lidhje me çfarë duan dhe çfarë nuk duan vendet anëtare. Ka një bllok të madh për ‘Po’, i cili kërkon vazhdimin e procesit. Pastaj ka dhe një barrikadë nga ana e Francës për të ndryshuar natyrën e procesit. Është një përplasje qasjesh brenda familjes europiane. Vazhdojnë përpjekjet intensive në të gjitha drejtimet. Ne jemi në komunikim të vazhdueshëm. Presidenti Tusk është një avokat i palëkundur i procesit. Kemi shkëmbyer informacionet e orëve të fundit. Përpjekjet vazhdojnë. Më e mira do të ishte një zgjidhje kompromisi, por mund të ndodhë gjithçka, çdo opsion është i hapur. Ka një përpjekje të brendshme të shumë vendeve për të bërë më të mirën dhe për të mos e lënë procesin të hyjë në hulli të panjohur”, shtoi Rama. /tesheshi.com/
