Nga Mensur Krasniqi
Pas njoftimit të Lëvizjes BESA se do të hapë një derë të re të bashkëpunimit opozitar duke prezantuar ofertën për një platformë opozitare, që parashikon ndërtimin e një fronti të përbashkët opozitar me të gjitha forcat progresive në vend, që kjo strukturë e BDI-së, përfundimisht të largohet nga skena politike shqiptare në Maqedoni, këtij propozimi i bashkangjiten edhe Aleanca për shqiptarët dhe Partia për Prosporitet Demokratik.
Ideja e këtij fronti opozitar sipas kryetarit të Lëvizjes Besa, Bilall Kasami, është që të iniciohet themelimi i një këshilli mbipartiak, në të cilin BESA do të jetë një ndër subjektet bartëse, ndërsa në të do të bëjnë pjesë më shumë subjekte politike opozitare, por edhe më shumë OJQ, si edhe intelektualë të pavarur, analistë e opinionbërës, por edhe afaristë, artistë, sportistë etj., pra të gjithë që duan ta shpëtojnë kombin nga kjo strukturë degraduese në Maqedoni.
Së pari këtë ide të Lëvizjes Besa e ka përshëndetur Partia për Prosperitet Demokratik, duke shtuar që vetëm më bashkim të opozitës mundet t’i japim fund të këqijave qeverisëse të “koalicionit të dollarëve” kryesuar nga BDI.
PPD shpreh respektin e saj për përcaktimin e “Lëvizjes Besa” të jetë një subjekt i barabartë politik, edhe pse është një ndër bartësit e projektit për ndërtimin e një Këshilli mbipartiak për pjesëmarrje në zgjedhjet e prillit 2016.
“PPD e riafirmon edhe një herë faktin se bashkëpunimi i ngushtë i deritashëm opozitar BESA-PPD e ka senzibilizuar dukshëm opinionin publik shqiptar për rrugën të cilën duhet ta ndjekin, duke iu bashkangjitur kësaj nisme qëllimirë, edhe subjekte tjera politike, e në veçanti ato në rregjistrim e sipër, si dhe intelektualë, opinionistë, studentë e profesorë universitetesh.
Duke iu përgjigjur pozitivisht ftesës së “Lëvizjes BESA” PPD ia rikujton opinionit shqiptar faktin se PPD ishte dhe mbetet burim i pashtershëm i platformave dhe opcioneve politike me një kapacitet të lartë politik e intelektual ose siç është shprehur Presidenti legjendar i Republikës së Kosovës Dr. Ibrahim Rugova “…dhe mos harrojmë se PPD e afirmoi çështjen shqiptare dhe Kosovën jo vetëm brendapërbrenda hapsirës politike shqiptare por edhe në arenën ndërkombëtare”.
Entuziast për qëndrimin e Lëvizjes BESA e cila ftoi partitë opozitare për një front të përbashkët opozitar është shprehur edhe sekretari i Lëvizjes për reforma në PDSH, Arben Taravari, ku përmes një postimi në faqen e tij në FB, ka shënuar se ndjehet tejet i lumtur që partia Besa, ndan të njëjtin vizion që ndan edhe Aleanca Opozitare së cilës i përket.
Sipas tij, partia Besa konfirmon mendimin absolut që shqiptarët duhet të kenë për të fituar të drejtat e tyre: Bashkimin e partive opozitare.
“Kjo parti ka shprehur nevojën e një fronti të tillë, dhe padyshim që ne jemi totalisht dakort me këtë parti, pasi ne kemi tre muaj që kemi ndërtuar një insitucion të tillë”, shkroi Taravari.
Andaj, vijon Taravari, “Aleanca midis LR-PDSH dhe RDK, pret krahë hapur Besën, ashtu si në gjirin e saj janë duke ardhur edhe faktorë të tjerë të rëndësishëm”.
“Jam krenar që djemtë dhe vajzat e partisë Besa duan të jenë pjesë e ekipit. Ata kanë kërkuar bashkim opozitar, dhe sigurisht që ne jemi gati për të pasur sa më shumë forca në grupin tonë. Partitë tona së bashku, do të shkrihen në një koalicion të gjërë, që tash më quhet ALEANCA PER SHQIPTARET”, shton ai në statusin e tij në FB. /tesheshi.com/
