Është e freskët ende ngjarja misterioze në Gorazhdefc të Pejës, ku në një natë të errët u dhunuan disa varre serbësh, u dogj një automjet dhe u shtie me armë në ajër, nga persona që nuk janë identifikuar ende, edhe pse kanë kaluar më shumë se dy javë.
Beogradi dhe serbët e Kosovës menjëherë brofën në këmbë duke vënë gishtin tek shqiptarët, por pa qenë në gjendje të thonë se përse duhet ta bënin shqiptarët atë gjë, derisa nuk ka asnjë situatë të rënduar ndëretnike, të paktën në Pejë e rrethina, që do e përligjnin një akt të tillë.
Por ka nga ana tjetër një të dhënë që të çon të dyshosh tek autorësia e atij akti. Një burim i portalit tesheshi.com, informon se Serbia është duke punuar shumë për destabilizimin e pjesëve të ndryshme të Kosovës, posaçërisht asaj veriore, në prag të hapjes së kapitullit 35 me BE-në, kapitull ky që ka të bëjë me normalizimin e tërësishëm të marrëdhënieve me Kosovën.
Sipas burimit, ditëve të fundit, në veri të Kosovës kanë hyrë dhjetëra kriminelë serbë të cilët kanë vetëm një qëllim: që me armë të ndryshme të kryejnë incidente para së gjithash në vende me popullatë të përzier, me qëllim që këto sulme t’jua faturojnë shqiptarëve.
“Kriminelët serb të cilët janë të vendosur nëpër motelet e Leposaviqit dhe Leshak, janë të paguar bukur mirë nga ana e Shërbimit Sekret Serb, BIA”, ka njoftuar një burim i portalit tesheshi.com me kusht të anonimitetit.
Burimi ka shtuar se disa shërbime të huaja të sigurisë që veprojnë në Kosovë kanë pak informacion për këtë grup prej 8-10 vetash, por që janë duke punuar në këtë drejtim për t’i kapur e për t’i dëbuar jashtë Kosovës.
“Personat që kanë ardhur në veri të Kosovës, kanë një të kaluar shumë të pasur kriminale dhe janë duke u paguar me para të majme vetëm që ta destabilizojnë Kosovën”, ka thënë burimi.
Burimi saktëson se Ministria e Punëve të Brendshme e Serbisë me agjentët e saj të sigurisë në Kosovë, ka futur njerëz që kanë qenë të dënuar mbi 15 vite burgim, me qëllim të kryerjes të punëve të pista, e që si shpërblim do paguhen me para të majme dhe do të lirohen edhe nga burgu.
Për ta mbështetur këtë të dhënë, burimi sjell dy incidentet e fundit që kanë ndodhur në veri të Mitrovicës, njëri tek tre rrokaqiejt dhe tjetri tek varrezat e shqiptarëve në veri, ky janë hedhur dy granata dore. Sipas tij, këto janë vepra direkt e këtyre kriminelëve që janë strehuar në rrethinën e Leposaviqit.
“Serbia pret të ndodh një incident i madh diku në Kosovë, me mundësi më të shumta në pjesën veriore të Mitrovicës, me qëllim të realizmit të të gjitha marrëveshjeve që i ka nënshkruar me Kosovën në Bruksel duke përmendur edhe Asosacionin e Komunave Serbe”, tha burimi, duke shtuar se me këtë Serbia do të akuzonte shqiptarë dhe institucionet e tyre se janë të pazotë që t’i mbrojnë serbët dhe për këtë arsye para ndërkombëtarëve do të kërkojë që Asosacioni të këtë edhe kompetenca ekzekutive.
Burimi më tej ka shtuar se grup i burgaxhinjve serbë që janë sjell në Kosovë me urdhër të BIA-së, janë të strehuar në motelin Oktan (tek fotoja kryesore), pronar i së cilit është një person i njohur me nofkën Bugarin.
“Për lëvizjen e këtij grupi në Leposaviq, dyshohet se përgjegjës për këtë është Zoran Millojeviq – Zhela, ndërsa për lëvizjen e tyre nëpër Kosovës përgjegjës është Zoran Stojkoviq, serb nga qyteti i Pejë, si dhe Dushan Mutavxhiq, që njohet si udhëheqësi i tifozerisë “Varrëmihësit” (Grobari) të klubit të futbollit të Partizanit të Beogradit.
Sa për incidentin e dy javëve më parë në Gorazhdefcë të Pejës, burimi i portalit vetëm sa hedh dyshime se në të mund të jenë implikuar kriminelë serbë nga këta të sipërcituarit, por nuk e konfirmon plotësisht.
“Nuk besoj në informacioni që po qarkullon nëpër institucione të sigurisë vendore e ndërkombëtare se sulmin në Gorazhdefc ndaj serbëve e kanë kryer gjuetarët shqiptarë. Pra kjo nuk qëndron. Por se kush e ka kryer këtë dhe se a janë të implikuar grupi i kriminelëve serbë të ardhur nga Beogradi, këtë nuk e di ta them”, ka thënë burimi. /tesheshi.com/
