Vdekja e një tjetër të riu në kushtet e ndalimit policor, ndodhur tre ditë më parë, ka hedhur të tjera hije dyshimi mbi profesionalizmin e efektivëve. Laert Kurti ndërroi jetë pasi u ndalua në zonën e Don Boskos, në Tiranë, ku më pas shfaqi problem shëndetësore, duke u përcjellë për në spital, ku dhe ndërroi jetë.
Nga hetimet ka rezultuar se shkak i përkeqësimit të shëndetit të tij që më pas ka çuar në humbje jete, ka qenë një qese më sasi lënde narkotike të gëlltitur, kuptueshëm gjatë ndalimit policor.
“Është administruar akti i ekspertimit kimik i kryer nga një grup prej 5 (pesë) ekspertësh, nga i cili ka rezultuar se në mbetjet e qeses së gjetura në stomakun e viktimës gjatë kryerjes së autopsisë, ka prani të lëndës narkotike kokainë”, thuhet në njoftimin e prokurorisë.
Jetëhumburi ishte konsumues droge, siç e ka konformuar dhe e ëma, e dyshohet të ishte dhe shpërndarës. Gjithashtu, kohë më parë kishte patur një çështje në polici.
Megjithatë, organi i akuzës kërkon të hetohen dhe efektivët që e kanë shoqëruar.
“Në vijim të veprimeve të tjera, grupi hetimor, me qëllim evidentimin e të gjitha rrethanave dhe shkaqeve të vdekjes së shtetasit Lear Kurti, do të administrojë pamjet filmike të urgjencës në Qendrën Spitalore të Traumës, pyetjen e personelit infermiero/mjekësor që kanë pritur dhe janë marrë me trajtimin e shtetasit Lear Kurti si dhe çdo veprim tjetër për zbardhjen e plotë të kësaj ngjarje”, ka njoftuar prokuroria.
Kjo ngjarje ka çuar dhe në protesta, të thirrura nga opozita, nën pretendimin se i riu është keqtrajtuar nga policia. /tesheshi.com/
