Ministri Lleshaj reagoi me anë të një mesazhi ngushëllues e sqarues njëherësh në lidhje me jetëhumbjen e 25-vjeçarit Klodian Rrasha, i qëlluar nga një efektiv policor për “vetëmbrojtje”, ngjarje e ndodhur mesnatën e së hënës në Laprakë.
Njeriu që drejton rendin në Shqipëri, thotë se çështja po hetohet, e se padyshim është e dhimbshme ajo që ka ndodhur.
“E VËRTETA ËSHTË NGUSHËLLIMI MË I MADH
Ka shumë arsye se përse e ndjej fort se çfarë do të thotë humbja e Klodian Rashës për prindërit dhe familjarët e tij. Në këto çaste të hidhërimit të madh, u shpreh atyre ngushëllimet e mia më të thella për këtë humbje tragjike.
Në të njëjtën kohë, shpreh besimin tim të plotë se organet ligjore përgjegjëse do të finalizojnë shpejt, saktë, drejt dhe jashtë çdo ndikimi hetimet për vrasjen e Klodian Rashës.
Kjo ngjarje ka prekur shumë njerëz, të afërm të viktimës, qytetarë të zakonshëm, pjesëtarët e Policisë së Shtetit dhe gjithë të tjerët.
Sot të gjithë kanë nevojë për qartësimin e plotë dhe shterues të rrethanave që sollën këtë ngjarje tragjike dhe autoritetet përgjegjëse ligjore duhet të përmbyllin sa më shpejt detyrën e tyre në shërbim të së vërtetës dhe të drejtësisë”, shkruan ministri Lleshaj.
Nga hetimet e deritanishme, është konkluduar se efektivi policor ka tejkaluar kompetencat duke qëlluar drejt 25-vjeçarit. /tesheshi.com/
