Nga Ylli Pata
Nuk është e para herë në Shqipëri kur jeta e një oficeri policie ikën në raste kur edhe mund të shpëtohej.
Vetëm në 6 vitet e fundit kemi tre raste të bujshme kur oficerë policie janë dërguar apo kanë shkuar në operacione me problem të qarta organizimi dhe pa një plan masash të plotë.
Ngjarja e Oblikës në Shkodër bëhet edhe më e rëndë kur mësohet se strumbullari nuk ka qenë një person me të dhëna kriminale dhe aftësi speciale në përdorimin e armëve të zjarrit, por ishte një person me problem mendore i ikur nga spitali psikiatrik vetëm pak kohë më parë.
47-vjeçari Ruzhdi Arishta, dje paradite është zënë me një komshi të tij, 21 -jeçarin, Besim Sherebela, për një gardh. Djaloshi i është kthyer me nerva dhe Arishta ka hyrë në shtëpi, ka marrë kallashnikovin dhe ka derdhur plumba mbi Besim Sherebelën.
Fatmirësisht nuk e ka vrarë.
Policia lokale e gjendur në panik, ka thirrur menjëherë Forcat Speciale të Shkodrës dhe ata kanë ndërhyrë menjëherë, ndërkohë që pikërisht rasti specifik i 47-vjeçarit duhet të kërkonte një reflektim më të menduar nga ana profesionale.
Dhe ndodhi ajo që ndodhi: komandanti i FNSH-së së Shkodrës, sipas gjasave i sapoemëruar, ka hyrë në shtëpi nga dera kryesore, por ka marrë një plumb në kokë që rezultoi fatal për jetën.
Të tjera dihen më pas, në fshatin e butë të Oblikës është lëshuar e gjithë policia që më në fund sot në mëngjes ka vrarë pas një shkëmbimi zjarri, atë që u vrau shokun.
Vetëm pak muaj më parë u vra në një pritë në Lazarat oficeri i Renea-s Ibrahim Basha, një efektiv model. Që nga analiza e cila u bë më pas doli se i ndjeri Basha ishte i keqpozicionuar dhe i keqarmatosur në operacion. Ndodhej në një makinë të pablindur në një zonë të rrezikshme me arsenale armatimi mjaft të rënda.
Në vitin 2009, 4 oficerë të trupave speciale: Fatos Xhani, Kastriot Feskaj, Sajmir Duçkollari dhe Altin Dizdari, u vranë teksa po arrestonin të shumëkërkuarin Dritan Dajtin.
Ka një tendencë mjaft frekuente në Shqipëri, ku drejtuesit politikë, krerët e qeverive apo ministrat; kur ka ngjarje të rënda përdorin shprehjen: “urgjent mbylleni”, duke krijuar stres tek efektivat me efektin kohë.
Është emblematike një shprehje e Pandeli Majkos kur ishte kryeministër që kërkoi RENEA-n të mbërrijë “urgjent në Tropojë” ndërkohë që rruga vetëm për të vajtur kërkonte 6 orë.
Në çdo vend të botës urdhëri politik nuk lidhet fare me ndërhyrjen shpejt apo vonë. Pasi ka ligj të përcaktuar për ndërhyrjen e policisë dhe miratimin e planit të ndërhyrjes. I vetmi urdhër që mund të japim drejtuesit politikë është që të mos ketë fare ndërhyrje në rast se kemi të bëjmë me një rast të rrezikshëm apo kur marrin përsipër negocimin. Por kjo s’ka ndodhur asnjëherë. /tesheshi.com/
