Opozita shqiptare kërkon që Jerusalemi të njihet si kryeqytet i Izraelit. Së paku duke ndryshuar votën në Asamblenë e OKB-së. “Zbulimi” i projektit politik të saj është bërë nga deputeti Edi Paloka në mbledhjen e komisionit të jashtëm, gjatë një dëgjese me ministrin Bushati, lidhur me bisedimet me Greqinë e votën “anti-amerikane” në OKB për Jerusalemin.
Paloka bëri me dije se opozita ka përgatitur një projekt rezolutë për ta votuar në Kuvend, ku vota e Shqipërisë nga “Jo” kalon në “Po”, pra pro Administratës Trump për Jerusalemin si kryeqytet i Izraelit
“Ne kemi një qëndrim tashmë politik për votën e Shqipërisë kundër Shteteve të Bashkuara në OKB”, tha Paloka.
Siç dihet, sqarimi qeveritar për votën në OKB, ka qenë ai sipas së cilit ka një pakt politik që Shqipëria të votojë në sinkron me BE-në. Në rastin e Jerusalemit, kundër ishte pothuajse e gjithë BE-ja. /tesheshi.com/
