Mijëra protestues dolën në rrugë nëpër Evropë, për të denoncuar vendimin e debatueshëm të administratës amerikane për të njohur Jerusalemin si kryeqytet zyrtar të Izraelit.
Marshime u mbajtën në Zvicër, Gjermani, Holandë, Itali dhe Suedi, ku protestuesit këndonin slogane në solidaritet me palestinezët, duke mbajtur flamujt e Palestinës dhe Turqisë.
Të mërkurën, Trump njoftoi njohjen e Jeruzalemit si kryeqytetin e Izraelit, si dhe planet për të zhvendosur ambasadën e SHBA në Izrael nga Tel Avivi në Jerusalem.
Vendimi i diskutueshëm i zemëroi muslimanët anembanë botës.
Në Gjenevë, protestuesit u mblodhën para Kombeve të Bashkuara, në qendrën e qytetit zviceran të shtunën për të kundërshtuar vendimin.
Demonstruesit thërrisnin slogane kundër Izraelit dhe vendimit të Trump mbi Jerusalemin, duke mbajtur flamuj në të cilat shkruante “Palestina e Lirë, Fund Pushtimit të Izraelit”.
Duke mbajtur flamujt në të cilat shkruante “Duart larg nga Jeruzalemi”, “Jeruzalemi është kryeqyteti i Palestinës” dhe “Jo, nuk ua japim Jerusalemin”, disa qindra njerëz nga organizatat joqeveritare u mblodhën edhe jashtë ndërtesës së Gjykatës Ndërkombëtare të Drejtësisë në Hagë.
Në kryeqytetin suedez Stokholm, mbi 2,000 protestues të shoqëruar nga Bashkimi i Demokratëve Evropianë të Turqisë (UETD) si dhe disa grupe vendase marshuan drejt Ambasadës së SHBA-së, duke thirrur “Liri për Palestinën”.
Një nga protestuesit, Dror Feiler, aktivist suedez me prejardhje hebreje, dënoi masën e Trump-it.
”Jerusalemi është një qytet i shenjtë për muslimanët, çifutët dhe të krishterët. Ndërsa këto tre grupe duhet të jetojnë në paqe këtu, Trump fatkeqësisht e ka vënë paqen në rrezik me vendimin e pafat që e ndërmorri”, tha Feiler.
Protestat shpërthyen gjithashtu edhe në qytetet gjermane të Dortmundit dhe Bremenit. Njerëzit reaguan kundër vendimit, i cili thanë ata, ishte një shkelje e të drejtave të njeriut.
Zhvendosja dramatike në politikën e Jeruzalemit të Uashingtonit shkaktoi demonstrata në territoret palestineze të pushtuara, Turqi, Egjipt, Jordani, Tunizi, Algjeri, Irak dhe vende të tjera muslimane.
Jerusalemi mbetet në qendër të konfliktit Izrael-Palestinë, me palestinezët të cilët shpresojnë që Jeruzalemi Lindor, tani i pushtuar nga Izraeli, mund të shërbejë përfundimisht si kryeqyteti i një shteti të ardhshëm palestinez. /tesheshi.com/
