Presidenti turk Rexhep Tajip Erdogan tha të hënën se në momentin kur vendosi të pranonte Jerusalemin për kryeqytetin e Izraelit, SHBA-ja u bë partnere në gjakderdhje.
“Duke vendosur ta njohin Jerusalemin për kryeqytetin e Izraelit, Shtetet e Bashkuara janë bërë partnere në këtë gjakderdhje. Njoftimi nga Presidenti i SHBA-së Donald Trump, nuk na obligon as ne, e nuk e obligon as Jerusalemin”, tha Erdogan në Ankara.
Presidenti i SHBA njoftoi javën e kaluar vendimin e Uashingtonit që të njohë Jerusalemin kryeqytet të Izraelit, dhe njoftoi transferimin e ambasadës amerikane nga Tel Avivi në atë qytet. Pas kësaj, shpërthyen protesta dhe përplasje të mëdha në kufirin me Rripin e Gazës dhe në të gjithë Bregun Perëndimor.
Ky vendim hasi në dënimin e gjerë të bashkësisë ndërkombëtare, madje edhe disa nga aleatët e saj që theksuan se ka provokuar në mënyrë të panevojshme një konflikt në një rajon tashmë të mbushur me dhunë.
Problemi i statusit të Jerusalemit qëndron në thelbin e konfliktit izraelito-palestinez, dhe veprimi i Trump-it është kuptuar në masë të madhe si anim kah pala izraelite.
Edhe një krizë më e vogël për statusin e Jerusalemit dhe vendet e shenjta në qytetin e vjetër në të kaluarën ka provokuar gjakderdhje, kujtoi AP më parë. /tesheshi.com/
