Udhëheqësi i Laburistëve, Jeremy Corbyn, paralajmëroi duke thënë se “Brexit pa marrëveshje do të linte Mbretërinë e Bashkuar në mëshirën e Presidentit amerikan Donald Trump dhe korporatave amerikane”.
“Brexit pa marrëveshje nuk do të rivendosë sovranitetin. Do të na lërë në mëshirën e Trump dhe korporatave të mëdha amerikane, të cilët të gjithë do t’i ngulnin dhëmbët e tyre në sistemin tonë të kujdesit shëndetësor, do të nënshkruanin dënimin me vdekje në industrinë tonë të çelikut dhe do të shkatërronin standardet tona të ushqimit”, shkroi ai në The Independent.
Corbyn do të takohet të martën me drejtuesit e disa partive për të diskutuar mundësinë e shmangies së Brexitit pa marrëveshje dhe për të ndaluar këtë “katastrofë”, siç ai e quajti mundësinë e largimit nga Bashkimi Evropian pa marrëveshje.
Udhëheqësi i Laburistëve dëshiron të iniciojë një votë mosbesimi kundër kryeministrit të ri Boris Johnson, kur Parlamenti mblidhet pas pushimeve verore.
Corbyn shpreson të bëhet kryeministër i përkohshëm dhe të kërkojë një zgjatje të afatit të caktuar të BE (31 tetor) për të shmangur Brexit pa një marrëveshje dhe më pas të thërrasë zgjedhje. /tesheshi.com/
