Qytetarë të shumtë të Prishtinës u mblodhën këtë të shtunë në sheshin “Zahir Pajaziti” për të protestuar kundër kandidaturës së Vuk Jeremiçit për Sekretar të Përgjithshëm të OKB-së.
Jeremiç, ish-ministër i Jashtëm i Serbisë në kohën që Kosova shpalli pavarësinë, njihet si një lobues i madh kundër njohjeve ndërkombëtare të saj. Por jo vetëm kaq. Protestuesit e kanë konsideruar si të papranueshme që një serb, vendi i të cilit ka kryer krime lufte për të cilat nuk ka kërkuar ende falje, të emërohet në krye të OKB.
Ata thanë se do t’i shkruajnë letër OKB-së dhe shteteve anëtare për të shprehur indinjatën për kandidimin e Jeremiçit, duke shtuar më tej se Kosova nuk do të heshtë pasi Serbia ende nuk ka kërkuar falje për krimet, dhunimet dhe shkatërrimin që ka bërë gjatë luftës.
Kujtojmë që Jeremiç pati deklaruar pak vite më parë se “OKB do mund ta njohë Kosovën vetëm pasi të shkelet mbi kufomën time”, e cila morri si përgjigje një batutë brilante nga Kadare: “Si shumë rëndësi po i jepni kufomës tuaj zotëri!” /tesheshi.com/
