Jepet alarmi në Maqedoni: shpenzimet për karburant nga deputetët po rrënojnë buxhetin e Kuvendit

Makinat personale të deputetëve të parlamentit maqedonas, i kushtojnë shumë buxhetit të këtij institucioni. Madje frika është se ata abuzojnë me faturat e karburantit. Konstatimi është bërë nga Revizioni Shtetëror në Maqedoni, një institucion auditi i ngjashëm me Kontrollin e Lartë të Shtetit në Shqipëri apo Auditin e Kosovës (të cilin gabimisht e quajnë Auditor). Sipas Revizionit. shpenzimet për udhëtime të deputetëve kanë marrë pjesën më të madhe të buxhetit të Kuvendit vitin e kaluar, dhe për këtë arsye kërkohet rishqyrtimi i mënyrës së pagesës së transportit të deputetëve, pasi dyshohet në saktësinë e faturave të dorëzuara.

“Deputetët marrin 30 për qind të çmimit shitës për një litër karburanti për udhëtim me makinat personale deri në vendin e punës. Revizioni vlerëson se është e nevojshme të bëhet analizë e mënyrës së kompensimit të shpenzimeve të deputetëve për përdorimin e makinës personale për qëllime zyrtare, në aspektin e kostos reale”, thuhet nga Revizioni Shtetëror.

Revizorët dyshojnë edhe në saktësinë e faturave të dorëzuara të udhëtimit jashtë vendit nga deputetët. Ata kanë konstatuar se paratë për këto lloj udhëtimesh nuk janë arsyetuar dhe kjo krijon rrezikun e shpenzimit të paspecifikuar të parave të taksapagueseve.

“Faturat për fondet e nevojshme për udhëtimet zyrtare nuk përmbajnë specifikime për shumën e mjeteve sipas llojeve të shpenzimeve (akomodim në hotel, transport shtesë, mëditjet dhe shpenzime tjera të paparashikuara) përmes të cilit përcaktohet përdorimi specifik i mjeteve devizore”, thuhet më tej nga Enti Shtetëror i Revizionit.

Skandali i fundit i shpenzimeve marramendëse ka ndodhur para disa muajsh kur ish-deputetja dhe anëtare aktuale e Komisionit Shtetëror Zgjedhor në rradhët e VMRO-së, Silvana Boneva vetëm për 6 muaj ka marrë 12 mijë euro për karburant dhe për amortizim të makinës së saj.

Sakaq, në vitin 2015, deputetëve si kompensim për pjesëmarrje në mbledhje dhe në trupat punues të Kuvendit u janë paguar 1 milion e dyqind mijë euro. Ndërsa vetëm për zgjerimin dhe përshtatjen e Kuvendit nga viti 2010 – 2015 janë shpenzuar mbi 16 milionë euro.

Dhe duke marrë parasysh mospërballimin e ngarkesës së lartë financiare nga ana e buxhetit të Kuvendit për zgjerimin e objektit të saj, ashtu siç ka konstatuar Revizioni janë nënshkruar anekse të kontratës bazë nga Kuvendi, për të cilën është dashur tender i ri, për shkak se nuk ka pasur të bëjë me punë të paparashikuara ndërtimore. Dhe në këtë formë edhe më shumë është rritur shuma e shpenzimeve për rinovimin e objektit të Kuvendit. M. Krasniqi – /tesheshi.com/