Kryeministri turk, Ahmet Davutogllu, ka mbajtur dje një fjalim para grupit të ri parlamentar të partisë së tij, AKP-së, ku ka shprehur dëshirën për çtensionimin e marrëdhënieve turko-ruse pas rrëzimit të avionit.
Ai e ka cilësuar Rusinë si një vend mik dhe fqinj: “Rusia është mikja dhe fqinja jonë. Kanalet e komunikimit tonë të dyanshëm janë të hapura. Por siguria jonë, si për çdo vend mik, duhet bazuar në parimin e respektit nën ligjin ndërkombëtar. Eshtë normale të mbrojmë hapësirën tonë ajrore kombëtare.”
Incidenti i rrëzimit të avionit, ka theksuar, Davutogllu, nuk ishte diçka që Turqia e dëshironte. Sipas tij, në çdo takim me zyrtarët rusë ishte tërhequr vëmendja nga Ankaraja për rëndësinë e shmangies së incidenteve të tilla.
Pasi vuri në dukje lidhjet e fuqishme ekonomike, politike dhe kulturore të Turqisë me Rusinë, kryeministri turk kërkoi kujdes nga të dyja palët për të mos e përshkallëzuar tensionin. /tesheshi.com/
