Celulari është kthyer dhe në një rutinë mëngjesi pothuajse të pashmangshme për shumë prej nesh, veçanërisht për fëmijët dhe të rinjtë. Por është shqetësuese që ky zakon, veçanërisht në një platformë si TikTok, mund të ketë pasoja të rënda në përqendrim dhe shëndetin mendor, veçanërisht tek popullata e re.
Megjithëse kërkimet mbi ndikimin afatgjatë të TikTok-ut në tru nuk janë ende të gjera, ka një rritje të vështirësive të përqendrimit tek fëmijët. Profesorja e psikiatrisë dhe pediatrisë, Jessica Griffin, tregon se si TikTok mund të ndikojë në trurin e fëmijëve që janë ende në zhvillim, por dhe të adoleshentëve e të rinjve.
Studimet kanë treguar se teknologjia, në përgjithësi, ndërhyn në kontrollin e impulsit dhe aftësinë për të vlerësuar kënaqësinë e vonuar tek të rinjtë. Videot në TikTok, veçanërisht për shkak të natyrës së tyre të shkurtër, shkaktojnë lirimin e dopaminës në tru, e cila mund të çojë në varësi dhe probleme me vëmendjen, përqendrimin dhe kujtesën afatshkurtër.
Një studim i fundit mbi efektet neurologjike të TikTok-ut te studentët kinezë tregoi se videot e personalizuara, të përzgjedhura nga algoritmet, aktivizonin qendrat e shpërblimit të trurit dukshëm më shumë sesa videot e rastësishme. Reagimet e disa ishin të ngjashme me varësinë dhe atyre u mungonte vetëkontrolli për të ndaluar shikimin.
Duke pasur parasysh aspektet negative të përdorimit të TikTok, prindërit përballen me sfidën se si të kufizojnë aksesin e fëmijëve të tyre në platformë.
Këshillohet që të keni një bisedë të hapur me fëmijët për pasojat e mundshme, t’i inkurajoni ata të përfshihen në aktivitete të ndryshme jashtë mediave sociale dhe të përdorni mjetet e menaxhimit të kohës në vetë platformën. Është e rëndësishme të krijohet një ekuilibër midis aktiviteteve online dhe atyre offline për të ruajtur shëndetin mendor të fëmijëve dhe adoleshentëve. /tesheshi.com/
