Pas raportimeve se gjatë 48 orëve të ardhshme mund të ndodhë destabilizimi i situatës në Veri të Kosovës, kryeministri Ramush Haradinaj në një konferencë të mbajtur pas mbledhjes së Këshillit të Sigurisë ka thënë se gjendja e rendit, ligjit dhe sigurisë është e qetë, por se për çfarëdo që mund të ngjajë institucionet do të jenë të gatshme që të përgjigjen.
“Kushdo që hyn në territorin e Kosovës me qëllim të prishjes së rendit dhe ligjit, do të marr përgjigje nga ligji ynë. Jemi në gjendje gatishmërie nëse ka prishje të rendit dhe ligjit”, tha Haradinaj.
I pyetur për paralajmërimet për shpallje të autonomisë në Veri, Haradinaj ka thënë se kjo është një retorikë nga Beogradi.
“Nesër grupi punues mund ta dorëzoj raportin për draft statutin e Asociacionit. Ne nuk kemi dal nga obligimet tona të marra në Bruksel, sepse ne kur e marrim raportin duhet të sigurohemi që është në përputhje me ligjet tona. Askush nuk e ka të drejtën të ndërmarr veprime të njëanshme”, ka thënë Haradinaj.
Kujtojmë se mediat serbe kanë raportuar se KFOR- i në orët e hershme të së enjtes (dje), nga baza e vet në fshatin Novosellë e Maxhunit të Vushtrrisë ka transferuar pjesë të pajisjeve teknike në Veri. /tesheshi.com/
