“Jelekverdhët” francezë po tentojnë të mbërrijnë deri në Bruksel, për të patur aty edhe një pozicion politik.
Lëvizja e tyre ka deklaruar se do të kandidojë për zgjedhjet e ardhshme të Parlamentit Europian dhe se deri në mes të shkurtit do të ketë një listë të udhëhequr nga Ingrid Levavasseur, një nga figurat kryesore përfaqësuese.
Lista e 79 kandidatëve do të shpallet në mes të shkurtit për zgjedhjet evropiane të planifikuara për më 26 maj, thuhet në deklaratë.
Janë tashmë dhjetë emra të qytetarëve nga 29 deri në 53 vjeç, me profesione të ndryshme – bëhet e ditur më tej.
Lëvizja “jelekët e verdhë” u shfaq në mënyrë spontane në rrjetet sociale, duke u derdhur më pas rrugëve e shesheve, duke ndërmarrë akte dhune të pangjashme. Shkak fillestar qe rritja e çmimit të karburanteve fosile, si kusht për detyrimet ndaj Marrëveshjes së Klimës së Parisit.
Pra, edhe pse me bazë dhunën, kjo Lëvizje tenton të mbërrijë e të përfaqësohet aty ku promovohen rregullat demokratike. /tesheshi.com/
