Michael Flynn, këshilltari për sigurinë kombëtare, do të jepte dorëheqjen në shkurt për komunikimet me rusët para se të merrte detyrën. Por nuk mbaron me kaq. Një tjetër zyrtar i administratës së Donald Trump-it gjendet tani nën të njëjtën akuzë.
Prokurori i përgjithshëm i SHBA-së, Jeff Sessions, ka folur dy herë me ambasadorin rus në Shtetet e Bashkuara gjatë fushatës presidenciale. Bëhet fjalë për një takim në verën e shkuar me Sergey Kislyak-un, e për një në shtator, kur po hetohej ndërhyrja ruse në zgjedhjet amerikane.
Sessions do të deklaronte në janar, përpara marrjes së detyrës, se nuk kishte patur kontakte me rusët gjatë fushatës elektorale, ndërkohë që dje thuhej në një deklaratë të tij se, “Unë kurrë nuk u takova me zyrtarë rusë për të diskutuar çështje të fushatës.”
Demokratët kanë kërkuar dorëheqjen e tij, duke e akuzuar se ka gënjyer nën betim.
“Prokurori i përgjithshëm duhet të dorëhiqet pasi ka gënjyer nën betimin ndaj Kongresit mbi komunikimet e tij me rusët,” deklaroi Nancy Pelosi.
Vënia e Jeff Sessions-it nën akuzë është në vazhdën e kundërvënies ndaj administratës së Trump-it. /tesheshi.com/
