I zgjedhuri nga presidenti Donald Trump për detyrën e prokurorit të përgjithshëm ka marrë miratimin nga senati amerikan.
I sulmuar nga demokratët për të shkuarën e tij në lidhje me të drejtat civile, senatori i Alabamës, Jeff Sessions, është konfirmuar në detyrë me 52 vota pro karshi 47 votave kundër.
Si një prej të emëruarve më të debatuar të Trump-it, vetëm një senator demokrat, Joe Manchin, votoi për prokurorin e ri të përgjithshëm.
“Nuk ka nder më të madh se të përfaqësoj popullin e Alabamës në organin më të madh vendimor në botë,” deklaroi Jeff Sessions pas votimit.
Një mbështetës i hershëm i presidentit Trump, prokurori i ri i përgjithshëm shihet si frymëzues i politikave të tij kundër emigracionit.
Jeff Sessions do të shërbejë si prokurori i përgjithshëm i 84-t i SHBA-së. Një prokuror nga viti 1981 gjer në vitin 1993, ai siguroi një vend në senat në 1996-n. /tesheshi.com/
