Amazon ka njoftuar se themeluesi dhe CEO i tij Jeff Bezos do të largohet si kreu i kompanisë që ai filloi gati tre dekada më parë në garazhin e tij dhe do të pasohet nga Andy Jassy.
Bezos do të bëhet president ekzekutiv, një lëvizje që ai tha se do t’i japë atij “kohë dhe energji” për t’u përqëndruar në produkte dhe iniciativa të tjera, raporton BBC.
Njeriu më i pasur në botë ka udhëhequr Amazon që nga fillimi i saj në 1994.
Kompania sot punëson 1.3 milion njerëz në të gjithë botën, dhe rritja shpërthyese u regjistrua vitin e kaluar, kur pandemia e virusit corona nxiti rritjen e tregtisë në internet.
Largimi nga pozicioni i shefit operativ kryesor
Ndryshimi në pozicionin drejtues do të ndodhë në gjysmën e dytë të vitit 2021.
Bezos u dërgoi një deklaratë punonjësve të tij duke i informuar ata se ishte i ngazëllyer për të njoftuar largimin e tij nga pozicioni i shefit operativ të kompanisë.
“Unë kurrë nuk kam pasur më shumë energji dhe kjo nuk është dalje në pension,” shkroi Bezos, 57 vjeç, duke thënë se ai po pret me padurim rezultatet e këtyre ndryshimeve.
Amazon krijoi të ardhurat më të larta tremujore të të gjitha kohërave në tremujorin e katërt të vitit të kaluar, duke tejkaluar shifrën prej 100 miliardë dollarësh për herë të parë.
Kompania deklaroi në raportin e biznesit se në tremujorin tetor-dhjetor 2020, ajo regjistroi të ardhura prej 125.56 miliardë dollarë, për shkak të valës së blerjeve të festave dhe rritjes së blerjeve në internet për shkak të masave pandemike që kufizojnë lëvizjen e njerëzve, raporton CNBC.
Fitimi tremujor është dy herë më i lartë se parashikimet e analistëve dhe arrin në 14.09 dollarë për aksion. Kompania Refinitiv, e cila mbledh dhe shet informacion financiar, parashikoi që fitimi do të arrinte në 7,23 dollarë për aksion.
Çmimi i aksioneve të Amazon u rrit 0.3 për qind në Wall Street pasi u publikua raporti financiar. /tesheshi.com/
