Nga Eva Gjura
Lajmet e kronikës së zezë bëhen çdo ditë edhe me tronditëse, jo vetëm për faktin se humbim jetë njerëzish, dhunohen gra e fëmijë, vidhen banesa e njerëz , por ajo që e bën edhe më të rëndë situatën në vend dhe shton mungesën e sigurisë është fakti se këto krime po kryhen nga “njerëz me uniforma policie”.
Gjatë vitit që sapo lamë pas, por edhe viti që sapo ka hyrë, sipas informacioneve të publikuara në media, por edhe nga vetë njoftimet e policisë mësohet se persona të paidentifikuar dalin në rrugë dhe po grabisin e vrasin qytetarët e këtij vendi të veshur me uniforma policie.
Po rendisim vetëm disa raste që janë shënuar kohet e fundit. Në Fushë-Krujë persona të veshur me uniformë policie grabisin një çift italian, dhe vetëm pak ditë më vonë po persona të veshur me uniformë policie grabisin një shtetas tjetër, fati i të cilit ende nuk dihet dhe policia nuk ka asnjë të dhënë për të.
Pa u sqaruar ende kjo situatë shënohet një tjetër grabitje, kësaj radhe në Shkodër, ku persona të veshur si policë vjedhin një argjendari. Autorët largohen pa lënë asnjë gjurmë.
Ngjarja që bëri shumë zhurmë në media, por vetëm kaq, ishte vjedhja e makinës me para të një banke dytësore në mes të ditës në zonën e Kasharit, teksa po shkonte për në Rinas dhe personat që e grabitën ishin persona të veshur më uniformë policie. Ende sot nuk ka asnjë autor të kapur për vjedhjen e 50 mijë eurove që ishin në makinën e bankës, gjithashtu s’ka asnjë gjurmë as për paratë e grabitura.
Ishin po dy persona të veshur me uniformë policie, të cilët rrëmbyen në mes të qytetit të Durrësit një person, i cili për fat të keq u gjet pak ditë më pas i vrarë dhe i masakruar në një fshat të Krujës.
Pa u sqaruar ende kjo ngjarje shënohet një tjetër edhe më e rëndë në Elbasan, persona të cilët dyshohet se ishin të veshur si policë kanë qëlluar me breshëri automatiku në drejtim të një lokali ku mbeten të vrarë disa persona dhe shumë të tjerë mbeten të plagosur.
Policia shkoi në vendngjarje po si gjithmonë autorët ishin larguar pa gjurmë sikur i përpiu dheu dhe ajo çka mbeti aty ishte vetëm gëzhojat e plumbave, pellgjet e gjakut dhe dhimbja e të afërmve për njerëzit e humbur. Ngjarja sërish është pa autorë.
Ç’po ndodh? sa të sigurt jemi dhe si mund ta dallojmë policin e mirë nga ai vrasësi dhe hajduti, i cili na del përpara i veshur si polic?!
Rastet telegrafikisht:
-29 nëntor 2014, një çift italian grabitet nga dy persona të veshur si policë në një nga lagjet e Fushë-Krujës.
-17 shkurt 2015 një person në Fushë-Kruje rrëmbehet nga persona të veshur si policë.
-2 tetor 2015 persona të veshur si policë rrëmbejnë një tjetër person në Fushë-Krujë.
-26 nëntor 2015 dy persona të veshur si policë grabisin me armë një argjendari në Shkodër.
-3 dhjetor 2015 katër persona të veshur si policë grabisin 50 mijë euro të një bankë në zonën e Kasharit në Tiranë
-6 janar 2016 persona të veshur si policë marrin peng dhe më pas e vrasin një person në lagjen nr 1 në Durrës.
– 3 shkurt 2016 persona të armatosur dyshohet të veshur si policë qëllojnë me breshëri armësh mbi një lokal të mbushur me njerëz në një nga lagjet e Elbasanit.
/tesheshi.com/
