Ushtarakë të lartë të ARM-së të afërt me presidentin Gjorgje Ivanov këtyre ditëve kanë shkuar në malin Jasen në periferi të Shkupit, që ka qenë një strehimore gjigante ushtarake gjatë kohës së ish-Jugosllavisë, shkruan javorja maqedonase Fokus.
Sipas asaj çfarë shkrihet, ata kanë inspektuar këtë zonë ushtarake dhe bunkerët nëntokësore, pasi që siç thuhet në rast të shpalljes së gjendjes së jashtëzakonshme nga ana e presidentit Ivanov, këtu do të instalohej ai dhe bashkëpunëtorët e tjerë. Oficerët e lartë kanë verifikuar bunkerët që janë edhe kundër helmeve kimike dhe ku mund të strehohen rreth 100 veta.
Aty siç thuhet është vlerësuar se sa ushqime duhet vendosur, si funksionojnë lidhjet e komunikimit dhe aspekte tjera, pasi që bunkerët ishin lënë pa trajtim gjatë kohë.
E gjitha kjo ndodh ndërsa vendi ka hyrë prej muajsh në një krizë të thellë politike. Vështirë të gjendet një lidhje mes kësaj që shkruan Fokus dhe gjendjes në terren, që gjithsesi është e rënduar politikisht. Por kur është fjala për Ballkanin, gjithçka mund të ndodhë me njerëzit që udhëheqin këtij rajoni gjithnnjë të nxehtë. /tesheshi.com/
