Nga tërë ndryshimet që kishin bërë skuadrat angleze gjatë kësaj vere, nuk ishte parë ende Çelsi i ri, me italianin Antonio Conte në krye të tij.
Derbi londinez mes Çelsit dhe Uest Hemit qe lënë për të hënën, si ndeshja e fundit e javës së parë të Premier League-s.
Çelsi do t’i fitonte tre pikët e para pas një goli në çastet e fundit nga Diego Costa. Një nisje e shkëlqyer për Çelsin, që vetëm një vit më parë do t’i bënte një fillim krejt ndryshe kampionatit.
Belgu Eden Hazard do të spikaste mes të tjerëve, për t’u përcaktuar dhe si lojtari i ndeshjes. Nuk do të mbetej prapa as Kante, i ardhur këtë sezon nga Lestëri.
Derbi do të përfundonte 2-1 për Çelsin. Pas një pjese të parë të mbyllur pa gola, Hazard shënon nga pika e 11-metërshit me të nisur pjesa e dytë. Uest Hemi e barazpeshon lojën në minutën e 77-të, kur Collins e dërgon topin në rrjetën e vendasve pas një rrëmuje në zonë. Diego Costa gjuan nga jashtë zonës në minutën e 89-të, i pangacmuar, për t’i dhënë fitoren Çelsit.
Një fitore e mundimshme për Çelsin, por mjaft e nevojshme për një nisje të re. Në anën tjetër, nuk u pa ai Uest Hem i sezonit të shkuar, edhe pse bëhet fjalë për një skuadër që gjithmonë është e vështirë të mundet.
Me tre pikët e fituara, Çelsi u bashkohet Mançester Junajtedit, Liverpulit e Mançester Sitit, që patën po ashtu një nisje me fitore. /tesheshi.com/
