Kjo javë e parë e majit është mjaft e rëndësishme për Kosovën, pasi Komisioni Europian pritet të heqë vizat për qytetarët e saj.
Këtë e kanë bërë të ditur jo vetëm presidenti i Kosovës dhe krerë të qeverisë, por edhe agjenci prestigjoze lajmesh si Reuters dhe EuroNews.
Vendimi pritet të merret të mërkurën në darkë apo të enjten në mëngjes nga ministrat e Brendshëm të vendeve anëtare të BE-së.
Por siç mësohet, do të ketë rregulla të forta për të mos provokuar një lumë të madh njerëzish nëpër aeroporte.
Vendimi i BE-së sipas gjasave do të hyjë në fuqi në fund të muajit qershor.
Qytetarët kosovarë do të vëzhgohen në mënyrë të qartë në vendet ku shkojnë që të mos kalojnë periudhën 90 ditore; dhe për këtë do të duhet të lënë adresë në stacionin e policisë më të afërt të zonës ku do të shkojnë.
Udhëtimin pa vizë mund ta bëjë çdo qytetar shtetas i Republikës së Kosovës që posedon pasaportë biometrike, por duhet të ketë arsye specifikimi udhëtimi.
Qytetarët e Kosovës. gjatë udhëtimit duhet të kenë me vete dokumente që dëshmojnë gjendjen e mjaftueshme financiare (dëshmi se kanë mjete të mjaftueshme për të mbuluar qëndrimin në shtetin përkatës), vendin ku do të qëndrojnë, arsyet e vizitës dhe sigurim shëndetësor.
Liberalizimi i vizave në asnjë rast nuk mundëson punësim apo ndonjë veprimtari ekonomike në shtetet e zonës Schengen.
Ndërsa për të studiuar në një nga shtetet e Schengenit, atëherë duhet leje e qëndrimit në shtetit përkatës që mundëson qëndrimin më të gjatë se 90 ditë brenda gjashtë muajve.
Qytetarët kosovarë do të jenë në mbikëqyrje të rreptë nga autoritetet kufitare dhe të emigracionit.
Policia kufitare e çdo shteti të zonës Schengen, ka të drejtë t’i mohojë hyrjen çdo qytetari në rast të dyshimit se mund ta keqpërdorë liberalizimin e vizave.
Në rast të shkeljes eventuale dhe abuzimit me liberalizim, pasojat për individ përfshijnë:
Shqiptim të gjobës me të holla, shënim zyrtar në dosje, ndalim të hyrjes në zonën Schengen në të ardhmen për pesë vjet. /tesheshi.com/
