Nga Blendi Gashi
Kjo javë, përveçse pritet të jetë përcaktuese për fatin e koalicionit qeverisës PDK-LDK, njëkohësisht pritet të përcaktojë edhe fatin politik të kryeministrit Isa Mustafa.
Marrëveshja e Demarkacionit që pritet të riprocedohet ë Kuvend, si dhe mocioni i opozitës që do votohet të mërkurën, qartësisht do tregojnë nëse do mbetet në këmbë qeveria aktuale apo vendi do të shkojë në zgjedhje të parakohshme parlamentare.
Sipas deklarimeve të bëra këtë javë nga drejtues të PDK-së dhe LDK-së, gjasat janë të mëdha që në muajin qershor qytetarët t’ia mësyjnë kutive të votimit, për të zgjedhur udhëjeqjen e re të shtetit.
Kjo e hënë pritet të ulë në tavolinën e bisedimeve Veselin dhe Mustafën, pasi të njëjtët kanë mendime diametralisht të kundërta për mënyrën se si po funksionon shteti, edhe pse e drejtojnë vet.
“Ajo që mund të them është se gjendja në Kosovë nuk është e kënaqshme. Duhet vendimmarrje në mënyrë që të permisiohet gjendja. Ka një pakënaqësi të qytetareve me mungesën e vendimmarrjes, njerëzit duan progres, dhe nuk janë te interesuar për kolltukët tona. Ky vend duhet lëvizur dhe ecur përpara. Këtyre qytetareve u duhet progres”, tha Veseli.
Dhe kjo deklaratë siç duket nuk i ka pëlqyer aspak Mustafës, i cili duke folur për mocionin e opozitës ka hedhur akuza në një mënyrë edhe drejt PDK-së, ndonëse nuk e përmend me emër.
“Nuk jam fare i shqetësuar për mocionin. Ajo çfarë kam parë unë deri më tani, kam vërejt se rrëzimin e qeverisë e kërkojnë të gjithë ata që kanë probleme me ligjin, ata që në të kaluarën kanë shkel dikund keq në ligj që me korrupsion me krim të organizuar dhe forma të tjera”, deklaroi Mustafa për RTK-në.
Kurse në një postim në Facebook, Mustafa ka hedhur akuza të tjera, duke thënë: “Asnjë mocion kundër qeverisë nuk i shpëton ata që mendojnë të plaçkisin 30 milion euro nga Telekomi i Kosovës, ata që ia bënë shtetit faturën e pasaportave mbi 5 milion euro apo ata që shpresojnë se do ta plaçkisin shtetin edhe përmes Axosit, nëse kjo qeveri bie”.
Pavarësisht se Mustafa bëhet sikur nuk i druhet rrëzimit të qeverisë, deklarimet e tij tregojnë qartë se tashmë e ka kuptuar që Veseli po dëshiron ta rrëzojë nga karriga e kryeministrit ku më pas të ulet vetë në të, pas zgjedhjeve sigurisht, me një koalicion të ri që pritet t’i lidhë me AAK-në e NISMA-n.
Dhe nëse një gjë e tillë ndodh, pra nëse LDK humb zgjedhjet, padyshim se zërat kundër Mustafës në parti do rriteshin dhe do kërkohej edhe rrëzimi i tij dhe nga kreu i partisë.
Andaj, kjo javë përcakton në një mënyrë edhe fatin politik të Isa Mustafës. Dhe sipas të gjitha deklarimeve të krerëve të lartë të PDK-së që janë “pro” zgjedhjeve, kjo parti tashmë veç ka vendosur që t’i japë goditjen e fundit kreut të LDK-së, pse jo edhe ta pensionojë nga politika, dhe në anën tjetër të nis rrugën që Kadri Veselin ta ulë në kolltukun e kryeministrit.
Kujtojmë se marrëveshja e nënshkruar mes PDK-LDK-së, në kohën kur e para drejtohej nga tash presidenti Hashim Thaçi, detyron grupet parlamentare të koalicionit që të mos përkrahin mocione për rrëzimin e qeverisë.
“PDK dhe LDK nuk do të përkrahin mocionet e mosbesimit të iniciuara nga palët e tjera në parlament”, thotë pika 14 e kësaj marrëveshje. Por sicc dihet tashmë, në mocion kanë hedhur firmat e tyre dhe deputetë të shumicës nga radhët e LDK-së.
Ndaj, , partitë opozitare VV, AAK dhe NISMA duken të entuziazmuara dhe tregohen të bindura se të mërkurën në Kuvend do të arrijnë t’i sigurojnë 61 votat për rrëzimin e qeverisë dhe shkuarjen në zgjedhjet e jashtëzakonshme, që sipas afateve ligjore do të parashiheshin të mbahen gjatë qershorit. /tesheshi.com/
