Nga Blendi Gashi
Një luftë e re që ka për protagonistë Jasharajt legjendarë, po shpërthen së fundi në Drenicë. Por kësaj here është politike dhe mes vetë kosovarëve, pa shkjaun përballë.
Është Bekimi i Hamzës, tashmë kreu i Komunës së Skënderajt, i cili ka shpërthyer mëngjesin e kësaj të marte me akuza në drejtim të paraardhësit të tij, Sami Lushtaku, njëherit kryetar i degës së PDK-së në këtë komunë.
Kryefaja e konferencës që mbajti Bekimi, është çelja e letrave për të bëmat gjatë kohës së luftës, ku tregoi për herë të parë për tradhëtitë sipas tij që i janë bërë familjes së tij, konkretisht babait Hamzës dhe axhës së tij, Ademit.
Jashari,duke folur për siç tha sabotimin që po i bën Samiu në komunë (fjala është për bllokimin e mbajtjes së seancës së fundit ku asambleistët e PDK-së dhe partive opozitare nuk morën pjesë, dhe vazhdimit të saj që ishte pararë të mbahej sot e për çka Bekimi e konsideron këtë të orkestruar nga Samiu), tha se se nuk befasohet për këtë gjë, pasi sipas tij Samiu i sabotoi edhe në luftën e 1998-tës.
“Ju boj apel qytetar të dashur, fuqia juaj për votën e juaj është e madhe. Unë mjaftë kam duruar deri sot. I ka ardhur fundi që me çdo kusht me blloku Bekim Jasharin. Nuk janë duke e lënë asnjë formë të mundshme pa e shfrytëzu për interesa të ngushta të tyre.
Se mu tenton mem sabotu Sami Lushtaku, nuk më befason aspak, sepse Sami Lushtaku edhe babain tim dhe mixhën tim i ka sabotuar duke ikur në vitin 1998 në Gjermani dhe është po ai i njejti Sami”, tha Bekimi.
“Do përballet me drejtësinë për të bëmat e pasluftës”
Por pasardhësi i familjes Jashari nuk u ndal me kaq, pasi foli edhe për të bëmat e Samiut edhe pasluftës, konkretisht sa udhëhoqi komunën e Skënderajt.
Ai renditi parregullsitë e qeverisjes së kaluar, duke filluar me pronat e uzurpuara e deri te keqpërdorimi i veturave zyrtare, duke bërë dhe paralajmërimet e rastit.
“Vetëdisojuni dhe kuptoni se kush ka interesa të ngushta në këtë vend, drejtësia ka mu marr me të gjitha pronat që janë uzurpua. Po ja u jap një rast, kerrin zyrtar të kryetarit të komunës, Sami Lushtaku deri me 11 dhjetor e kam marrë me dy goma të dimrit dhe verës, kur e kemi shiku se pse tha para një muj ditë i kemi ngjitë katër. Deri në at nivel janë shku edhe gomat me i marrë” akuzoi Bekim Jashari.
Ky reagim i pinjollit të Jasharajve, vjen pasi që javën e kaluar asamblistë e PDK-së lëshuan seancën dhe e bojkotuan sërish edhe sot.
Pashmangshëm e gjithë kjo situate lidhet me përçarjet e fundit në PDK ku Sami Lushtaku e largoi nga detyra e nënkryetarit të Degës në Skënderaj, Bekim Haxhiun (Kamishin) i cili është krahu i Bekim Jasharit.
Mbetet të shihet se cili do jetë reagimi i Lushtakut për akuzat që ja mveshi Bekimi, si për sabotimin gjatë luftës ndaj familjes Jashari ashtu edhe për keqpërdorimet e bëra gjatë drejtimit të komunës së Skënderajt. /tesheshi.com/
