Në Tokio, Perandori japonez Akihito dhe Perandoresha Michiko janë përkulur përpara memorialit për viktimat e tërmetit dhe cunamit që goditi vendin katër vjet më parë.
Më 11 mars të vitit 2011 një tërmet nënujor me magnitudë 9 goditi brigjet lindore të rajonit Tōhoku në Japoni, duke shkaktuar një cunam me pasoja tejet tragjike.
Dallgët e tij shkonin deri në 40 metra dhe kanë hyrë deri në 10 kilometra në qytet, larg nga brigjet detare. Sipas të dhënave nga autoritetet japoneze, numri i viktimave shkon mbi 18 mijë, nga të cilët 2633 janë ende të zhdukur.
4 vjet pas kësaj fatkeqësie, autoritetet vendore kanë mbajtur një minutë heshtje në Tokio dhe në të gjitha qytetet e prekura nga ngjarja e rëndë, në kujtim të viktimave.
Katastrofës natyrore iu bashkua edhe incidenti në centralin nuklear në Fukushima Daiichi, e menaxhuar nga kompania Tepco. Cunami dëmtoi sistemin ftohës të centralit, duke shkaktuar bashkimin e tre reaktorëve.
Rreth 300 mijë persona u detyruan të linin banesat e tyre në zonat përreth centralit, për shkak të rrezatimeve. 4 vite pas cunamit, rreth 230 mijë persona jetojnë ende në banesa provizore, larg nga shtëpitë e tyre.
Në zonën e Tōhoku, më e prekura nga cunami, janë ndërtuar rreth 6 mijë banesa, nga 30 mijë të parashikuara./tesheshi.com/
