Traktati i Kombeve të Bashkuara për Ndalimin e Armëve Bërthamore hyri në fuqi dje, pasi 50 shtete e ratifikuan atë në tetor të vitit të kaluar, por Japonia, i vetmi vend që ka përjetuar tragjedi me bombë atomike – Hiroshima dhe Nagasaki – refuzon të nënshkruajë këtë marrëveshje.
“Japonia nuk ka ndërmend të aderojë në një marrëveshje ndërkombëtare për të ndaluar armët bërthamore,” përsëriti kryeministri Yoshihide Suga, duke shprehur dyshime rreth efektivitetit të një marrëveshjeje të tillë, e cila nuk mbështetet nga shtetet e armëve bërthamore.
Suga theksoi se Traktati për Ndalimin e Armëve Bërthamore nuk ka mbështetjen e shumë vendeve që nuk posedojnë armë bërthamore dhe se Japonia beson se është e nevojshme të vazhdohet në një rrugë të qëndrueshme dhe reale drejt çarmatimit bërthamor, duke gjykuar se marrëveshja në fjalë nuk e garanton këtë.
Suga gjithashtu tha se Japonia do të ishte “e kujdesshme” në shqyrtimin e statusit të vëzhguesit.
“Si i vetmi vend në histori që ka pësuar një sulm atomik gjatë luftës, Japonia ka një përgjegjësi të marrë drejtimin në përpjekjet e bashkësisë ndërkombëtare për të arritur një botë pa armë bërthamore,” i tha Suga parlamentit.
Forcat bërthamore bojkotuan negociatat
Suga shtoi se Japonia do të vazhdojë përpjekjet për të “ndërtuar një urë” midis shteteve me armëve bërthamore dhe shteteve jo-bërthamore, duke përfshirë komunikimin në botë të pasojave të tmerrshme të përdorimit të armëve bërthamore.
Traktati Ndërkombëtar për Ndalimin e Armëve Bërthamore deri më tani është ratifikuar nga 86 shtete dhe ishte iniciativë e Fushatës Ndërkombëtare për Heqjen e Armëve Bërthamore (ICA), e cila fitoi Çmimin Nobel për Paqe në 2017
Shtetet e Bashkuara, Britania, Franca dhe fuqitë e tjera bërthamore nuk nënshkruan marrëveshjen dhe bojkotuan negociatat që çuan në të. /tesheshi.com/
