Dhënia e shtetësisë shqiptare për Kryepeshkopin Janullatos, akt i ndërmarrë nga Presidenti Meta, nuk ka hasur kundërshti nga pjesa tjetër e politikës. Monika Kryemadhi e ka vlerësuar gjestin e bashkëshortit të saj, deri në pikën kur tha se Janullatos ka bërë për Shqipërinë më shumë se politikanët shqiptarë.
E nga ana tjetër, Taulant Balla, një anti-LSI-st i njohur, nuk ia ka marrë për të madhe Metës aktin e tij nderues për klerikun e lartë grek, tashmë edhe shqiptar. E ka quajtur akt “të vonuar”, krahas dhe një lloj leksioni mbi harmoninë fetare.
“Së pari kjo është një ditë e bukur për të gjithë shqiptarët. Harmonia fetare e pagjendur në asnjë vend tjetër në botë përveç në Shqipëri ka bërë që edhe në myslimanët ta festojmë me po të njëjtën ndjenjë këtë festë. Familjet tona janë të përbëra edhe nga të krishterë dhe nga muslimanë, por ky është shembulli dhe pasaporta më e mirë e shqiptarëve në botë. Sa i përket pyetjes tuaj, është diçka shumë e mirë edhe pse e vonuar”, tha Balla në dyert e Kishës Ortodokse. /tesheshi.com/
