Një grup deputetësh të opozitës kanë paraqitur kërkesën në Kuvend për të formuar një grup të ri parlamentar, jashtë PD-së. Çështja pritet të shqyrtohet në këshillin e mandateve dhe rregullores së Parlamentit, pas kërkesës së Partisë Socialiste, e cila e konsideron kërkesën e depozituar si jo në përputhje me Kushtetutën. Inisiativa për krijimin e grupit parlamentar është e drejtuesve të partive të vogla, që u përfshinë në listën e deputetëve të PD-së dhe u çertifikuan si ligjvënës të kësaj partie nga KQZ.
Por tashmë, pas betimit në Kuvend si deputetë, Fatmir Mediu, Dashamir Shehi dhe Nard Ndoka, të ndihmuar edhe nga ligjvënës demokratë mund të formojnë një grupim të ri parlamentar, pjesë të opozitës.
Burimet shprehen se Hekuran Hoxholli, Fatbardha Kadiu, Isuf Çela dhe Nadire Meçorapaj, deputetë të PD-së, mund t´i bashkohen grupimit të ri parlamentar.
Ende nuk dihet nëse kësaj inisiative do ti bashkohet apo jo Vangjel Dule, kryetar i PBDNJ-së.
Rregullorja e Kuvendit parashikon që të paktën 7 deputetë mund të formësojnë një grupim parlamentar, i cili duket se do të funksionojë thjesht dhe vetëm për të krijuar një mundësi më të madhe për opozitën, veçanërisht në debatet mes saj dhe mazhorancës. Nëse ky grupim do të formësohet, atëherë në Kuvendin e Shqipërisë do të ketë 4 grupe parlamentare: PS, PD, LSI dhe grupimi miks i deputetëve që përfaqësojnë disa parti. /tesheshi.com/
