Vonesa e zbatimit të ligjit të vettingut e ka një kleçkë. Dhe përkatësisht ka të bëjë me mosngritjen e Byrosë së Hetimit dhe Prokurorisë Speciale, të cilat janë thuajse gati dhe vetëm nisja e skanimit të anëtarëve të tyre po vonon nisjen e operacioneve antokorrupsion.
Një burim diplomatik i tha tesheshi.com se bëhet fjalë për në fund të janarit që të përfundojë në pranga një “VIP” shumë i rëndësishëm, dosja e së cilit tashmë është mbyllur.
Sipas po të njëjtit burim, këtu e ka çelësin edhe vonesa e vetttingut por edhe mosvendimi i Ilir Metës për koalicionin e 2017-s.
Ka një stres super të shtuar në politikë.
Donald Lu foli dje për politikanë të majtë dhe të djathtë.
Ndërkaq në Tiranë kanë mbërritur katër persona që do të monitorojnë procesin e kapjes së “peshqve të mëdhenj”.
Po kush janë ata?
Ata janë katër: përkatësisht dy meshkuj dhe dy femra: një prokurore rumune, një nga Kroacia, një agjent i FBI dhe një prokurori i SHBA-së.
Secili do të ndjekë një rol të caktuar dhe do të jenë muskotierët e drejtësisë së re.
Dy prokuroret nga Kroacia dhe Rumania dhe ai nga SHBA do të asistojnë Prokurorinë Speciale, ndërsa agjenti i FBI-së do të asistojë Byronë Kombëtare të Hetimit.
Agjenti i FBI-së që do jetë pjesë e Byrosë do jetë Robert Beckman. Ai është një oficer me 30 vite përvojë kryesisht në luftën antikorrupsion.
Ndërkohë, bashkë me të në Tiranë ka mbërritur dhe Prokurori Federal i Shteteve të Bashkuara, Mark Chutkow. Edhe ai ka shumë përvojë dhe do asistojë në gjetjen e parave të pista dhe të fshehura jashtë vendit. Ndërkohë një rol të rëndësishëm do kenë dhe dy femra. E para është Florentina Mirica, e cila është prokurore në Rumani.
Ajo është pjesë e Prokurorisë Speciale atje dhe ka marrë pjesë në hetimin e dhjetra zyrtarëve, teksa për shkak të hetimeve të saj shumë prej tyre kanë përfunduar në burg.
Ndërsa kroatja është Koraljka Bumci. Ajo është e njohur në Shqipëri pasi ka asistuar në hartimin e ligjit për luftën ndaj korrupsionit. Pas kësaj ajo tani do të ndihmojë për zbatimin e tij në praktikë.
Gjatë diskutimeve të ligjit për SPAK apo Prokurorië Speciale në komisionin e reformës në drejtësi, ekspertët e SHBA kanë thënë se ata do të ndihmojnë përveç me trajnime edhe me pajisje speciale.
Në ligj është parashikuar që Byroja Kombëtare të ngrihet 4 muaj nga hyrja në fuqi e ligjit. Sipas informacioneve, në fillim të vitit 2017 SHBA pritet që të sjellë të gjitha pajisjet e saj të nevojshme, pasi në janar Byroja pritet të jetë gati. Në ligj është ngarkuar qeveria që të ngrejë godinën e re dhe më pas ajo do jetë në duart e SHBA dhe BE. Fakti tjetër interesant është se të gjithë personat që do futen aty, që nga drejtori dhe agjentët do përzgjidhen nga amerikanët. Në këtë mënyrë Byroja do jetë e gjitha në dorë të tyre. Pak ditë më parë u firmos marrëveshja mes dy vendeve dhe ajo pritet që të miratohet nga parlamenti. /tesheshi.com/
