Ministri i Rendit Sandër Lleshaj publikoi shifrën rekord të bllokimit të patentave në një muaj, në rrugët e Shqipërisë.
“Vetëm për këtë muaj, që ende nuk është mbyllur, janë rreth 1.500 leje drejtimi të pezulluara, që është një shifër jashtëzakonisht e lartë, e cila na shqetëson për faktin se konstatojmë nivel papërgjegjshmërie të madh në rrugët e vendit nga një pjesë e konsiderueshme drejtuesish”, tha Lleshaj gjatë inspektimit të një patrullë në aksin famëkeq Selitë – TEG, aty ku zakonisht bëhet pilotim alla Formula Uno nga një kategori drejtuesish.
Por edhe pse masat e ashpra nuk po japin efekt, kreu i Rendit paralajmëroi ashpërsim të tyre.
“Viti 2020 është shpallur viti i sigurisë rrugore me qëllim që të gjitha strukturat e Ministrisë së Brendshme, të Policisë së Shtetit, Ministrisë së Infrastrukturës dhe Energjisë, të gjitha strukturat e tjera shtetërore, dhe jo, të angazhohen në një fushatë të madhe për forcimin e parametrave të sigurisë rrugore.
Përpjekja jonë për ta intensifikuar kontrollin do të vazhdojë, ashtu sikundër do të vazhdojë edhe përpjekja për të rishikuar të gjithë kuadrin ligjor dhe nënligjor, me qëllim që siguria rrugore në vitin 2020, të njohë një kapërcim pozitiv përpara. Do të ndërhyjmë në legjislacion, në Kodin Rrugor duke ashpërsuar masat ndaj atyre që shkelin rregullat e qarkullimit, kryesisht atyre që abuzojnë më celularin, atyre që abuzojnë me pijet alkoolike, atyre që abuzojnë me të drejtën e përparësisë në rrugë dhe atyre që nuk kujdesen për fëmijët”, tha ndër të tjera Lleshaj.
Kjo që po ndodh në rrugët e Shqipërisë, ku masat ndëshkimore nuk japin efekt, përbën dhe rrëzimin e tezës së Ramës sipas së cilit “fajin e ka sistemi dhe jo njeriu”. Siç po shihet, sistemi po funksion(ligji), por njeriu(kultura, formimi) jo. /tesheshi.com/
