Një prej lojtarëve më të spikatur të kampionëve të rinj të Anglisë, të skuadrës së Lestërit, Jamie Vardy, është shumë pranë kalimit te Arsenali.
Golashënuesi i 24 golave në kampionatin anglez të sapopërfunduar mësohet se do të kryejë vizitat mjekësore të dielën pasdite në ambientet stërvitore të “topçinjve”.
Trajneri i Lestërit, Claudio Ranieri, e ka pohuar interesimin e Arsenalit kur është pyetur nga më e madhja gazetë sportive italiane, La Gazzetta dello Sport.
Jack Wilshere, mesfushori i Arsenalit dhe i kombëtares angleze, duket të ketë luajtur një rol të madh në bindjen e Vardy-t që t’i bashkohet Arsenalit.
Shpresa te Arsenali është që të nënshkruajnë me lojtarin brenda dy ditëve, përpara se ai të udhëtojë drejt Francës me përfaqësuesen angleze.
Nëse transferimi realizohet, kjo do të jetë blerja e dytë e Arsenalit në pak ditë, duke pasuar atë të Granit Xhakës.
Arsenali po tregohet kështu ekipi më i paduruar për t’u kompletuar për sezonin e ri, në një tentativë të re për të fituar diçka të rëndësishme në futbollin anglez, gjë që i mungon prej kohësh. /tesheshi.com/
