Shkarkimi i Claudio Ranieri-t mbetet tema kryesore në futbollin anglez. Kurba e teknikut italian te Lestër Siti i përngjan ngjitjes në majë dhe shembjes përtokë më pas. Kampionët e Anglisë rrezikojnë seriozisht të bien nga kategoria vetëm pak muaj pasi bënë të tyren trofeun e Premier League-s.
Një prej të akuzuarve për kundërvënie ndaj teknikut është Jamie Vardy, sulmuesi i Lestërit, që sezonin e shkuar pati rol thelbësor në suksesin e skuadrës.
Në vështirësi tashmë, me pesë gola të shënuar në 25 ndeshje të kampionatit, Vardy duhet të përballojë dhe akuzat për minim të punës së Claudio Ranieri-t, çka çoi në shkarkimin e tij.
Përkundër të gjithave, Vardy ka reaguar ndaj këtyre zërave, duke mohuar gjithçka.
Ja si shprehet ai për Ranieri-n: “Claudio ka patur dhe do ta ketë gjithmonë respektin tim të plotë.”
Tejet të dhimbshme i quan ai spekulimet për të.
“Ka spekulime që unë u përfshiva në shkarkimin e tij, dhe kjo është tërësisht e pavërtetë, e pabazuar dhe tejet e dhimbshme.”
Vardy shënoi ndaj Seviljes në mesjavë, teksa Ranieri ishte ende në stol; në postimin e tij në Instagram nuk kursehen fjalët e mira për italianin.
“Ai besoi në mua kur shumë nuk kishin besuar, dhe për këtë i detyrohem një mirënjohje të pakufishme. I uroj Claudio-s më të mirën në atë që i sjell e ardhmja. Faleminderit Claudio për gjithçka!” /tesheshi.com/
