E përditshmja sportive spanjolle AS flet për një marrëveshje të arritur mes James Rodriguez-it dhe klubit anglez të Mançester Junajtedit, çka e afron shumë largimin e kolumbianit nga Reali i Madridit.
AS i referohet një stacioni radiofonik kolumbian, RCN, kur raporton se mesfushori me tipare sulmuese ka nënshkruar një kontratë paraprake me Mançester Junajtedin.
Lojtari dhe agjenti i tij, Jorge Mendes, mësohet të jenë takuar së fundi me presidentin e Realit, ku dhe i kanë paraqitur ofertat ekzistuese, mes të cilave duket të jetë ajo e “djajve të kuq”.
Sipas RCN-së, drejtuesit e Realit nuk kanë për ta diskutuar të ardhmen e lojtarit kolumbian gjer në mbyllje të sezonit, ndërsa është përpara dhe finalja e Champions League-s.
I ardhur tre vite më parë te Reali, pasi shkëlqeu në botërorin e Brazilit, James Rodriguez nuk ka mundur asnjëherë të jetë palëkundshmërisht pjesë e formacionit të parë.
Pavarësisht aktivizimeve të pakta këtë sezon, ai ka shënuar tetë gola në kampionatin spanjoll, me të ardhmen e tij të prirur drejt një tjetër kampionati tanimë, drejt atij anglez. /tesheshi.com/
