Ukraina ka fituar festivalin e këngës të Eurovizionit me baladën “1944”, të kënduar nga këngëtarja Jamala.
Ndryshe traditës, kënga fituese i kushtohej këtë herë një ngjarjeje të dhimbshme historike, syrgjynosjes nga Josif Stalini të rreth 200 mijë tatarëve të Krimesë më 18 maj të vitit 1944.
Jamala, e para tatare e Krimesë që këndon në në festival të tillë, ia kushtoi këngës gjyshes së saj, që atë 18 maj të largët do të detyrohej ta linte Krimenë me pesë fëmijë në krah.
Kënga qe parashikuar të renditej në tre vendet e para, por ajo u shpall fituese, duke mposhtur Rusinë,
një rivale dhe në festival.
534 pikë mori kënga ukrainase, me këngën që përfaqësoi Australinë në vend të dytë. Kënga ruse do të renditej e treta, me 491 pikë.
“Dua vërtet paqe dhe dashuri për çdokënd,” ka thënë Jamala me të marrë çmimin. “Isha e sigurt se do t’i prekja njerëzit nëse do të flisja mbi të vërtetën.”
Provokative dhe të politizuar e ka quajtur Russia Today pjesëmarrjen e Ukrainës në Eurovizion, duke shpjeguar në të njëjtën kohë se kënga qe frymëzuar nga deportimi i tatarëve të Krimesë gjatë Luftës së Dytë Botërore.
Jamala fitoi në Stokholm me një këngë që mbetet aktuale, ndërsa Krimeja është aneksuar dy vite më parë nga Rusia. /tesheshi.com/
