Kryetari i Këshillit Kombëtar të Nismës për Kosovën dhe ish-kryeparlamentari, Jakup Krasniqi ka drejtuar akuza të shumta lidhur me misionin e EULEX-it, duke thënë se në Kosovë nuk është duke u luftuar krimi e korrupsioni, e as aktorët kryesorë të tij, por po ndiqet politikisht kryevlera e popullit shqiptar – Ushtria Çlirimtare e Kosovës.
Ai, në një shkrim autorial të postuar në rrjetin social Facebook ka shtuar se në kohën kur përkëdhelet Serbia, duke i amnistuar kriminelët serbë për krimet e kryera e të konfirmuara serbe në Kosovë, i gjithë presioni i ndërkombëtarëve është drejtuar ndaj të ashtuquajturave “krime” të kryera nga pjesëtarët e Ushtrisë Çlirimtare të Kosovës.
“Për mua është e qartë, në Kosovë nuk është duke u luftuar krimi e korrupsioni e as aktorët kryesorë të tij, por, po ndiqet politikisht kryevlera e popullit shqiptar – Ushtria Çlirimtare e Kosovës, arkitektja e Republikës sonë. Shikojeni Kabinetin qeveritar, jo vetëm të tanishmin, numëroni, sa ministra ishin e janë me origjinë nga UÇK-ja?! Njeriu duhet të jetë më shumë se miop që të pajtohet me deklarimet politike të shefit në ikje të EULEX-it! Disa veprime të këtyredite të qeveritarëve tanë, tingëllojnë tepër politike, mbase si duket janë edhe pazar politik, ndarja e 500 lëndëve, 490 për Sistemin e Drejtësisë së Kosovës e 10 për EULEX-in?! Nëse paskan qenë të ditura 500 lëndë, a thua përse u heshtën deri më tani?Madje kush dhe si po e dinë që nuk janë më pak ose më shumë lëndë (kur mbi 4000 lëndë janë në pritje në sirtarët e gjykatave), pse saktësisht janë bash 500 lëndë?! Po vjedhja në dhomën e dëshmive a e plotëson numrin 500?!!!…”, ka shkruar Krasniqi. /tesheshi.com/
