Ish–kryetari i Kuvendit të Kosovës e njëherësh kryetar i Këshillit Kombëtar të Nismës, Jakup Krasniqi ka reaguar ndaj një deklarate të kryeministrit të vendit, Isa Mustafa, i cili ka këmbëngulur se nuk do të lëshojë pe ndaj opozitës dhe se zgjedhjet do të mbahen pas dy vjetëve.
Krasniqi i është përgjigjur kësaj deklarate të Mustafës, duke thënë se kryeministri mund të mos i frikësohet opozitës, por Vuçiqit, sipas Krasniqit, ai jo vetëm që ia ka frikën “por as për së gjalli nuk po ndihet”.
Frikë të njëjtë, sipas Krasniqit, Mustafa ka edhe nga dosjet e dorëzuara në Prokurori ndaj tij.
“Mediet po shkruajnë se Isa Mustafa paska thënë: “Nuk lëshoj pe as nuk frikësohem. Zgjedhje sot dy vjet!” Kur njeriu e thotë një fjalë që nuk ia ka kërkuar ndokush e as i ka thënë kush, është treguesi më i mirë i kompleksitetit që ai ka për frikën. Ndoshta nuk i frikësohet opozitës, por Vuçiqit dhe dikujt tjetër, ai jo vetëm që ua ka frikën, por as për së gjalli nuk po ndihet! Nuk dihet sa ua ka frikën Dosjeve në Prokurori?!”, ka shkruar Krasniqi.
Sipas tij problemi nuk është kush se kur do mbahen zgjedhjet dhe sa do të zgjatë mandati i këtyre qeveritarëve, por çështja është shumë më esenciale.
“Për çdo ditë të këtij kryeministri idhnak, Kosova do të ketë më pak integritet e sovranitet dhe Serbia do të ketë më shumë më shumë pushtet e sovranitet në Kosovë. Apo ndoshta për këto lëshime të një pas njëshme faji është i Dosjeve te frikshme?!
Kush nuk e vëren dhe nuk e sheh ketë, është më shumë së i verbër!
Shikim e mendim të kthjelltë mos të pres kush nga këta qeveritarë!”, ka shkruar Krasniqi.
/tesheshi.com/
