Është i bindur se deputetët do t’i thonë “JO” Demarkacionit me Malin e Zi nëse kjo marrëveshje dërgohet këtë javë në Kuvend pas dakordimit të zv.ndihmëssekretarit amerikan Hoyt Lee me kryekyvendarin Veseli. Thotë se kjo marrëveshje ose duhet të rishikohet ose të dërgohet në arbitrazh.
Kështu shprehet ish-kryeparlamentari Jakup Krasniqi, në një intervistë për tesheshi. com ku flet edhe për takimin e djeshëm që zhvilloi në Durrës me deputetin e PDK-së Adem Grabovcin çka bëri bujë të madhe në mediat kosovare, për koalicionet e mundshme paszgjedhore dhe deklaratat e Ramës dhe Thaçit për bashkim.
Intervistoi: Blendi Gashi
Po e nisim intervistën rreth takimit tuaj me deputetin e PDK-së, Adem Grabovci në Shqipëri ku mediat jo pak e lidhën me mocionin për rrëzimin e qeverisë. Ka diç të vërtetë në këtë mes apo u takuat rastësisht?
Takimi sa ishte i rastësishëm ishte edhe i shkurtër. Nuk kishte temë politike e as përmbajtje politike.
Pasi jemi te Grabovci, ju siç dihet gjatë kohës sa keni drejtuar Kuvendin, në tetor të 2012 keni pasur një konfrontim me të. Kush nga ju ia zgjatët dorën e pajtimit njëri-tjetrit?
Konfrontimet, debatet politike, madje as dallimet e ashpra politike a programore kurrë nuk i kam konsideruar armiqësi që duhet të të pajtoj dikush. Se paku kjo është kultura ime politike.
Si po ec puna e mocionit për rrëzimin e qeverisë inicuar nga partia juaj NISMA? Sa nënshkrime keni mbledhur dhe a pritni që do ketë sukses?
NISMA e ka marrë një iniciativë e cila është në interes të rrethanave bllokuese që janë krijuar në politikën e Kosovës. Kur një koalicion nuk kryen asnjë punë të mirë për vendin, shkuarja në zgjedhje është domosdoshmëri. Natyrisht, shkuarja në zgjedhje varet nga partitë e koalicionin që nuk po dinë të qeverisin me vendin.
Zv.ndihmëssekretari amerikan Hoyt Lee dhe Veseli janë dakorduar që Demarkacioni të dërgohet këtë javë në Kuvend. A pritni të ratifikohet?
Demarkacioni me Malin e Zi kështu si është nuk duhet të kaloi, duhet gjithsesi të rishikohet. Kuvendi duhet që t’i thotë jo. E pastaj të hapen rrugët për procedura të tjera, rishikimit ose arbitrazhit.
Nëse nuk kalon Demarkacioni a pritni që vendi të shkoj në zgjedhje, apo ky koalicion do e çojë mandatin deri në fund?
Kur në Kuvendin e Kosovës nuk mund të merren vendime të rëndësishme, shkuarja në zgjedhje bëhet domosdoshmëri.
Ju personalisht preferoni një koalicion pas zgjedhor mes partive opozitare apo koalicionin PDK-AAK-NISMA? Nëse bëni koalicion me PDK, ju a do jeni pjesë e tij?
Koalicion parazgjedhor mund të ketë vetëm mes partive opozitare. Parita NISMA për Kosovën është për koalicion opozitar.
Për fund, si i shihni deklarimet e Ramës dhe Thaçit se do bashkohen Shqipëria e Kosova nëse dy vendet nuk anëtarësohen në BE?
Deklaratat janë jo serioze. Shtetet qeverisen me vendime e jo me deklarata të thata. /tesheshi.com/
