Futbollisti i përfaqësueses së Shqipërisë shënoi për të dytën javë radhazi në kampionatin elitar zvicerian.
Pasi realizoi dy gola në fitoren 3-0 të Lucernës ndaj Vaduzit më 3 dhjetor, Jahmir Hyka gjeti sërish rrjetën dje në humbjen e ekipit të tij në transfertë.
Sioni fitoi 3-1 ndaj Lucernës dhe u ngjit në vend të tretë në Superligën e Zvicrës, duke e lënë kundërshtarin një vend më poshtë. Dy ekipet kanë nga 29 pikë, por Sioni, veç fitores në përballjen e drejtpërdrejtë, ka dhe një golavarazh më të mirë.
Hyka u fut në lojë në pjesën e dytë dhe shënoi në të vetmin rast të pastër për ekipin e tij.
Goli i Hykës qe më tepër ngushëllues, ndërsa vendasit udhëhiqnin 3-0. Ky qe goli i gjashtë për të në këtë kampionat.
Futbollisti 28-vjeçar shqiptar ka rigjetur formën e fillimsezonit, për të lënë pas një periudhë jo të mirë, kur do ta shihte veten dhe në tribunë. /tesheshi.com/
