Në një konferencë për mediat, presidentja e Kosovës, Atifete Jahjaga, ka deklaruar se pas konsultimeve me krerët e institucioneve, me kryeministrin dhe kryetarin e Kuvendit, i ka ftuar për dialog partitë politike parlamentare, në përpjekje për të tejkaluar gjendjen e krijuar në vend.
Ajo ka thënë se diskursi dhe veprimet e dhunshme në institucione dhe jashtë tyre gjatë ditëve të fundit janë të papranueshme, e se rrezikojnë të dëmtojnë konsensusin demokratik në Republikën e Kosovës.
“Ftesat tashmë u janë dërguar si subjekteve politike të koalicionit qeveritar, ashtu edhe partive opozitare, fillimisht për takime të ndara në zyrën time, dhe përfundimisht – në mirëbesim – në tryezë të përbashkët,” ka theksuar znj. Jahjaga.
Më tej ajo ka nënvizuar: “Shpresoj që kjo iniciativë e imja të ndihmojë që shqetësimet t’i adresojmë me pjekuri politike dhe duke dëshmuar angazhimin tonë, që të jetësojmë përkushtimin tonë për një demokraci parlamentare që fuqizon institucionet, forcon besimin e qytetarëve në perspektivën e vendit të tyre dhe krijon pajtimin bazik për rrugën tonë përpara.”
“I thërras partitë politike dhe përfaqësuesit e tyre t’i përgjigjen ftesës dhe të tregojnë vullnet që bashkërisht të gjejmë gjuhë të përbashkët për daljen nga kjo gjendje. Tash më shumë se kurrë është momenti t’ua dëshmojmë të gjithë qytetarëve që na e kanë besuar udhëheqjen e këtij shteti se dëshira e tyre për të jetuar në paqe, të kenë një ardhmëri të sigurt për ta e për brezat e ardhshëm, nuk është premtim që zbehet përballë sfidës së parë, por udhërrëfyes, obligim, besë e dhënë se dallimet tona, të çfarëdo natyre, i tejkalojmë në tryezë, duke biseduar, duke gjetur zgjidhje bashkërisht dhe duke marrë përgjegjësi për to,” ka deklaruar Jahjaga në konferencën për mediat. /tesheshi.com/
