Sot, presidentja Atifete Jahjaga do t’i drejtohet Gjykatës Kushtetuese për Marrëveshjen për themelimin e Asociacionit të Komunave me shumicë Serbe.
Por ky hap i presidentes nuk ia ka ndërruar mendjen partive opozitare për ta zhbllokuar Kuvendin.
Nga partitë opozitare është bërë e ditur se do të vazhdojnë me protesta brenda Kuvendit, pasiqë siç thonë ata, nuk kanë shpresa nga
Kushtetuesja, e cila, sipas tyre më herët kishte refuzuar ta shqyrtojë Marrëveshjen e 19 prillit, marrëveshje kjo nga e cila buron edhe marrëveshja për Asociacionin.
Po ashtu, sipas përfaqësuesve opozitarë, vendimin për t’iu drejtuar Kushtetueses Jahjaga e ka marrë për shkak të presionit.
Ajo në takimet e fundit që ka pasur me liderët partiakë veç e veç, ua ka propozuar idenë që t’i drejtohet Kushtetueses, gjë e cila sipas saj, është përshëndetur nga palët.
“Në takimet e ndara që i kam pasur edhe me kryeministrin e vendit edhe z/kryeministrin, edhe me liderët e opozitës, kam propozuar që në kuadër të kompetencave kushtetuese t’i drejtohem Gjykatës Kushtetuese për të shqyrtuar përputhshmërinë e parimeve të Asociacionit të Komunave Serbe me Kushtetutën e Kosovës”, ka deklaruar Jahjaga gjatë një konference për gazetarë./tesheshi.com/
